Antxotarrek beren garagardo artisaua izango dute aurrerantzean: Antxobeer. Pasa den igandean aurkeztu zuten Garagardo Artisauaren III. Mostran.
Antxoberfest jaialdiko aurreko urte bateko irudia.
Karamelu kolorekoa, mingotsa eta leuna aldi berean, eta edateko erraza. Halakoa da Antxobeer, Marealtako garagardoa. Joan den igandean aurkeztu zuten Antxoberfesteko antolatzaileek Pasai Antxon egin zuten Garagardo Artisauaren III. Mostran. Pasai Antxok, beraz, badu bere garagardo artisaua.
Aurkeztu zuten egunean harrera paregabea izan zuen pale ale garagardoak, bertara eramandako 120 botilak agortu zirelako. Antxoberfesteko antolatzaileetakoa da Marcos Novo. Garagardoa sortu izana aurrera urratsa dela dio: «Pasai Antxok bere garagardo artisaua izango du aurrerantzean, kalitatezkoa, denok edateko modukoa, eta Antxoberfesten ikur izango dena».
Antxobeer garagardoak istorio «berezia» duela atzean aitortu du. Garagardo artisauaren ikastaroa antolatu zuten duela zazpi urte La Armonia elkartean: «Bederatzi kuadrillek eman zuten izena parte hartzeko. Horien artean Joseba Oliva antxotarra aritu zen kuadrillarekin, ikastaro osoa egin zuen, eta hura amaituta garagardoa egiten jarraitu zuen bere etxean, garajean zehazki».
Lau urte geroago antolatu zuten lehenengoz Garagardo Artisauaren Mostra. Olivari bere garagardoarekin aurkezteko eskatu zioten Antxoberfesten antolatzaileek: «Ez zuen etiketarik, etxean egindakoa zen. Harrituta gelditu ginen oso ona zelako, eta kritika oso onak jaso zituelako». Olivarekin hitz egitea erabaki zuten Antxoberfestekoek eta proposamena egin zioten «ez soilik garagardo festibalean parte hartzeko, baizik eta gure garagardoa egiteko».
Olivaren formula
Barañaingo garagardo artisaua ekoizten duen Brew&Roll enpresarekin harremanetan jarri ziren, «batzuetan kolaborazioak egiten ditu», eta Olivak etxean ekoizten zuen garagardoaren formula pasatu zioten nafarrei, «baiezkoa eman ziguten, garagardoa egiterik izango zela esan ziguten, eta gainera garagardo oso ona izango zela.
Olivaren errezetarekin eta Brew&Rollen laguntzarekin Antxobeer jaio da, Marealtako garagardoa, Antxoberfesteko ikur izango den garagardoa».
Joan den igandean aurkeztuta, maiatzaren lehen asteburuan izango da berriz ere, garagardo berria dastatzeko aukera. Maiatzaren 5 eta 6an salgai izango dute eta banaka, edota seiko kutxetan eskainiko dute, 2,50 euroan eta 13 euroan, hurrenez hurren. Egun horietarako 800 botila aterako dituzte salmentara Antxon bertan. Hurrengo hitzordua, berriz, Antxoberfesten izango du barrutiko garagardo artisauak, eta ordurako, sei kupela egingo dituzte.
Maiatzaren 10etik 13ra bitartean egingo dute Antxoberfesten zazpigarren ekitaldia. Orain arte garagardo feriak izan duen erantzunarekin izugarri pozik daudela esan du Novok, «gure jaia da, guk egina eta guretzat, antxotarrentzat. Biltzen dugun diru guztia herrian bertan gelditzen da, eta iaz, adibidez, San Fermin eta San Fermin Txiki jaietako danborradentzako danborrak eta kupelak erosteko baliatu genuen, baita herri bazkariak merkeago antolatu ahal izateko ere. Gurea da festa hori eta hala sentitzen dugu».
Antxokoa ez da beste garagardo azoken antzerakoa, Novoren esanetan, «gure azokan garagardoen kalitatea oso handia da. Beste azoketan normalean banatzaile bati eskatzen diote 10 edo 12 iturri jartzeko. Antxoberfesten eskaintzen ditugun garagardo guztiek hautaketa prozesu bat pasatzen dute, gure laguntzaile da Zapiain, eta haiekin aukeratzen ditugu ahalik eta garagardorik onenak».
Garagardo bereziak
Hortaz, beste azoketan ohiko ez diren garagardoak aurki daitezke Antxoko garagardo festan, «Alemaniako Weihenstephaner, Belgikako Gulden Draak eta Westmalle garagardoak barrilean aurkitzea ezinezkoa da beste azoketan, eta gurean izaten dira». Joan den urtean lehenengoz, Belgikako Hopus Premier garagardoa eskaini zuten kupelean.
Garagardo artisauaren egoeraren gaineko irakurketa egitera ausartu da Novo, «artisau garagardoen artean maila oso ona da, altua, eta hori pozgarria da benetan». Aurreko asteburuan antolatutako mostran hori nabarmen gelditu zela zehaztu du: «Lan ederra egiten ari dira, oso onak dira hemengo garagardoak, eta artisau garagardo guztiak orokorrean».
Hiru ekoizle nafar, hiru bizkaitar, bi gipuzkoar eta arabar batek hartu zuten parte erakustaldian. Adituek osatutako epaimahaiak Bilboko Drunken Brosen ekoizlearen Bowie garagardoari eman zion lehen saria, «garagardo beltza da, kafe eta txokolate zaporearekin». Publikoaren saria, berriz, Oreretako Mattinada artisau garagardoarentzat izan zen, «finagoa da azken hori».
Erromantikoak direla aitortu du Novok, eta Antxoberfesten marka izango den garagardoa sortzea aurrera pausua ematea izan dela dio, «garagardoaren kultura zabaltzea da gure helburua». Hala egiten ari diren zalantzarik ez da.
Hortaz, beste azoketan ohiko ez diren garagardoak aurki daitezke Antxoko garagardo festan, «Alemaniako Weihenstephaner, Belgikako Gulden Draak eta Westmalle garagardoak barrilean aurkitzea ezinezkoa da beste azoketan, eta gurean izaten dira». Joan den urtean lehenengoz, Belgikako Hopus Premier garagardoa eskaini zuten kupelean.
Garagardo artisauaren egoeraren gaineko irakurketa egitera ausartu da Novo, «artisau garagardoen artean maila oso ona da, altua, eta hori pozgarria da benetan». Aurreko asteburuan antolatutako mostran hori nabarmen gelditu zela zehaztu du: «Lan ederra egiten ari dira, oso onak dira hemengo garagardoak, eta artisau garagardo guztiak orokorrean».
Hiru ekoizle nafar, hiru bizkaitar, bi gipuzkoar eta arabar batek hartu zuten parte erakustaldian. Adituek osatutako epaimahaiak Bilboko Drunken Brosen ekoizlearen Bowie garagardoari eman zion lehen saria, «garagardo beltza da, kafe eta txokolate zaporearekin». Publikoaren saria, berriz, Oreretako Mattinada artisau garagardoarentzat izan zen, «finagoa da azken hori».
Erromantikoak direla aitortu du Novok, eta Antxoberfesten marka izango den garagardoa sortzea aurrera pausua ematea izan dela dio, «garagardoaren kultura zabaltzea da gure helburua». Hala egiten ari diren zalantzarik ez da. 
