Zerbitzu berriarekin 943 34 13 45 telefono zenbakira deitu eta altzariak bildu behar dituzten langileekin hitzartuko dute bilketa lekua eta ordua.
Bernar Lemos eta Jose Cruz Legorburuk eman dituzte sistema berriaren gaineko xehetasunak.
Altzariak jasotzeko zerbitzu berria martxan jarriko du udalak maiatzaren 2tik (asteazkena) aurrera, eta horrenbestez, bertan behera geldituko da orain arte martxan zegoena. Zabor bilketa puntura egun eta ordu jakin batzuetan atera behar zituzten altzariak orain arte bizilagunek; orain, ordea, zerbitzu berriarekin 943 34 13 45 telefono zenbakira deitu eta altzariak bildu behar dituzten langileekin hitzartuko dute bilketa lekua eta ordua. Telefono bidezko zerbitzua izango da, beraz. Deiak goizez jasoko ditu zerbitzuak 08:00etatik 15:00etara, eta arratsaldez, berriz, erantzungailuan mezua uzteko aukera izango dute bizilagunek.
Bilketa, gainera, eskatzailearen ataritik ahalik eta hurbilen egingo dute udal langileek, hori egitea posible den kasuetan. Horrela ezin denean, berriz, eskatzaileak eta zerbitzuko langileek adostutako puntuan jasoko dute.
Bernar Lemos Hirigintza zinegotziak eta Jose Cruz Legorburu Ingurumen zinegotziak eman dituzte zerbitzu berriaren xehetasunak. Altzariak goizez eta arratsaldez ezarritako ordutegiaren arabera jasoko dituztela azaldu du Lemosek, baina eskaeraren arabera doitzen joango direla ordutegi hori behar izanez gero, “bizilagunek eskatzen dutenaren arabera moldaketak egitea izango da ordutegi horretan, zerbitzua ahalik eta eraginkorrena egin eta bizilagunen beharretara moldatzeko” .
Orain arteko sistema maiatzaren 2tik aurrera bertan behera geldituko dela nabarmendu dute, bestalde, eta sistema berria kudeaketa orokorraren barruan kokatu dute: “Hau ez da bat-batean sortutako zerbait, prozesu luze baten emaitza baizik”. Altzari bilketa sistema berriak ikuspegi ekologikoa hobetuko duela azaldu du Hirigintza zinegotziak, eta udala horren inguruan lanketa sakona egiten ari dela erantsi du, “egindako lana emaitzek bermatzen dute”. Hiriko paisaiari ere “on” egingo diola sistemak argi du Lemosek.
Zerbitzu berria azaltzeko eta herritar guztiengana heltzeko kanpaina abiatu du udalak gaur bertan. Horren barruan, postontzi guztietan eskuorria banatuko dute, eta atarietan kartela jarriko dute zerbitzuaren berri emanez. Telefono zenbakia eta zerbitzuaren bidez jasoko direnak biltzen dituen imana ere banatuko dute, bestalde. Bideoa ere zabalduko du udalak bere sareetan, sistema berriaren gaineko informazioa zabaltzeko.
Zerbitzuaren bidez jasoko diren altzariak
Sistema berriak zehaztuta ditu jasoko dituen altzariak. Zerbitzuko langileek, altzariak (mahaiak, armairuak, sofak…); koltxoiak eta somierrak; lerro zuriko etxetresna elektrikoak: hozkailuak, arropa garbigailuak, mikrouhin labeak…; eta lerro gris eta marroiko etxe tresna elektrikoak: telebistak, ordenagailuak, dVd irakurgailuak… bilduko dituzte.
Ez dituzte jasoko, ordea, pneumatiko zaharrak, pintura poteak, obra hondakinak, olioa, pilak, bateriak eta abar. Hala ere, erabiltzaileek zerbitzuaren 943 34 13 45 telefono zenbakian aurkituko dute zalantzen erantzuna.
