Etxe kaleratzerik ez dute nahi

Kaleratzeak Stop plataformak elkarretaratzea egingo du ostegunean Sabadell banketxeak Errenterian duen egoitzaren aurrean. Errenteriar bat etxetik kaleratu nahi dutela salatuko dute bertan.

Ikerne Zarate Gartziarena

Errenteria-Orereta

2018/04/24

Putre funtsen aurkako salaketa Sabadell banketxeraino eraman dute.

Putre funtsen aurkako salaketa bat Sabadell banketxearen aurrean.

Kaleratzeak Stop plataformak elkarretaratzea egingo du ostegunean Sabadell banketxeak Errenterian duen egoitzaren aurrean. Errenteriar bat etxetik kaleratu nahi dutela salatuko dute bertan. Kaltetuarena ez da prozesu berria, hiru urte darama banketxearekin negoziatzen etxea kendu gabe akordio batera heltzeko. Kaltetuak berak azaldu dio HITZAri banketxeko bost negoziatzailerekin bildu dela denbora honetan guztian, eta akordioetara heldu badira ere, negoziatzailea aldatu eta lortutakoa bertan behera utzi duela bi alditan heldutako banketxearen negoziatzaile berriak, “adar jotze bat da, funts putreak laguntzeko prest izaten dira baina bertakoak garen autonomo, edota bestelako langileei zailtasunak baino ez dizkigute jartzen, eta adostutako akordioak ere ez dituzte errespetatzen”. Banketxeak etxetik kaleratu nahi du orain. Bertan, menpekotasun handia duen 94 urteko amarekin bizi da. Hitzartutakoa errespetatzeko eskatu dio Sabadell banketxeari, eta hori bera eskatuko dio Kaleratzeak Stop plataformak etzi 10:00etatik 13:00etara egingo duen elkarretaratzean. Protesta egingo dute, baita informazioa banatu, eta hipotekarekin, edo beste arrazoiengatik banketxeren batekin arazoa duten herritarrak bertaratzera deitu ditu Errenteriako bizilagunak, “informazioa emango dugulako bertan egin daitekeenaz. Gainera, Gipuzkoan gaur egun kalteturik ez da gelditzen etxerik gabe, arazoaren atzean banketxe bat dagoenean behintzat, Kaleratzeak Stop plataforma egiten ari den lan eskergari esker”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.