Sirena hotsak eta isiltasuna indarkeria matxista salatzeko
Pasaiako mugimendu feministak deituta elkarretaratzea egin zen atzo Antxoko Gure Zumardian Gasteizeko bi hilketak salatzeko.
Hilotzak irudikatuz emakume gorputzak zerraldo Gure Zumardiaren erdian, eta Bi emakume erailak dioen aldarriaren atzean pasaitarrak, Gasteizeko azken hilketa matxistak salatzera plazara bilduta.
Sirena hotsak entzun dira, hots lazgarriak, eta jarraian mugimendu feministaren irakurketa, hilketen oinarrian eguneroko indarkeria matxista dagoela gogorarazteko: “Eragilea, senar ohia, eta laguntzaileak, sistema kapitalista heteropatriarkala, komunikabideak, hezkuntza, erlijioa, kultura…”, ozen entzun da megafoniatik.
“Nazkatuta eta haserre gaude” tinko adieraziz bukatu dute irakurketa, eta azkenik, minutuko isilunean bildu dira, isilune ozenean, “mendiari, kale ilunei, eta etxeetako sukalde eta oheei” oihu eginez.
