500 dantzari plazara

Euskal Herritik heldutako zortzi talde eta 500 dantzarik hartuko dute plaza maiatzaren 1ean egingo duten Dantzari Txiki Egunean.

Ikerne Zarate Gartziarena

Errenteria-Orereta

2018/04/26

Dantzari Txiki Eguna. Argazkia: Carrera.

Dantzari Txiki eguna egingo dute maiatzaren 1ean, asteartea, Ereintza Dantza Taldeak antolatuta, Errenteria Musikal eta udalaren laguntzarekin. Euskal Herritik heldutako zortzi talde eta 500 dantzarik hartuko dute plaza; talderik jendetsuena, Errenteria Musikal izango da, azken horretako 250 dantzarik hartuko baitute parte. Iruñeako Amaiur, Beasaingo Aurtzaka, Lasarte Oriako Erketz, Urretxuko Lurra, Lezoko Murixka, Hernaniko Ttarla eta Tolosako Udaberri taldeetako dantzari txikiak izango dira Errenteria-Orereta girotzen. Koldo Mitxelena plazan (Esmalteria) hasiko da jaia, bertan bilduko baitira dantzari guztiak 11:00etan, eta hamaiketakoa jan ondoren, herriko kaleetan zehar ibiliko dira dantzari. Ibilbidean zehar, gainera, hainbat geldialdi egingo dituztela jakinarazi dute antolatzaileek: Foru plazan, Xabier Olaskoaga plazan, Koldo Mitxelena ikastetxeko jolastokian, eta Herriko plazan, azkenik. Zumardian amaituko dute desfilea 13.30ean, eta bertan talde guztiek elkarrekin emanaldia eskainiko dute goizeko saioa amaitzeko. Bazkalostean, berriz, dantzaldia izango da trikitilariekin hasi eta Modestorekin amaitzeko, 16:15etik aurrera. Eguraldiak laguntzen ez badu, Galtzarabordako kiroldegian egingo dute Dantzari Txiki Eguna, Koldo Mitxelena plazako goizeko hitzordua mantenduta. Bazkariak herriko elkarteetan Bertaratuko diren 500 dantzariek herriko elkarteetan bazkalduko dutela nabarmendu nahi izan dute antolatzaileek, eta eskerrak eman dizkiete urtero ematen duten laguntzagatik. Bukagaitz, Txepetxa, Amulleta, Gure Toki, Gau Txori, Niessen, Ondarra, Txintxarri eta Alkartasunan bazkalduko dute dantzariek. Errenteria-Oreretak Dantzari Txiki egunaren harira Euskal Herriko beste herrietako dantzariak hartzen dituen moduan, Ereintza Dantza Taldeak antolatutako irteeretan parte hartzen ari direla Errenteria Musikaleko dantza ikasleak zehaztu dute antolatzaileek, eta dagoeneko, Tolosa, Iruñea, Oiartzun, eta Hernaniko Dantzari txiki egunetan izan dira. Datozen egunetan berriz, Lezo, Beasain eta Lasarte Oriakoetan izango dira.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.