Belaontzien 'La Victoire' estropadak Pasaiako Itsas Festibalarekin bat egingo du aurten
Gaur aurkeztu dute III. La Victoire zeharkaldia, Donostiako Untzi Museoan.
Donostian aurkeztu dute gaur goizean duela hiru urtetik Hondarribiko Nabigatzaileen elkarteak urtero antolatzen duen La Victoire belaontzien estropada. Zeharkaldiak Pasaia eta Port Medoc arteko ibilbidea osatu ohi du urtero, Lafayettek AEBerako independentzia Gerrara Pasaiako portutik abiatuta 1777. urtean egin zuen lehen bidaia gogoratuz.
Gaurko aurkezpenean, Hondarribiko Nabigatzaileen elkarteko Jose Luis Artolarekin batera, Pasaiako alkate Izaskun Gomez, eta estropadaren babesle Bankoa Credit Agricole banketxeko Josu Arriola eta Patrice Lato izan dira, baita Untzi Museoko zuzendari Raul Perez ere.
Aurkezpenean zehaztu dutenez, maiatzaren 19an porturatuko dira belaontziak Pasaian, 11:00ak inguruan, eta ordurako L`Hermione, Lafayettek bigarren bidaian erabili zuen ontzi historikoaren erreplika eta Itsas Festibalaren harribitxia, portuan izango da (maiatzaren 17an porturatuko da L’Hermione 18:00ak inguruan).
Badia barruan desfilatu ondoren emango zaio hasiera belaontzien estropadari , 12:00etan, eta hurrengo egunean, maiatzaren 20an porturatuko dira Port Medoc-en. Parte hartzaileek Itsas Festibalaren testuinguruan antolatutako hainbat ekitaldietan parte hartuko dute, eta irteteko bezperan, besteak beste, L’Hermione bisitatu eta han talde argazkia egingo dute.
Izen-ematea zabalik dago jada, eta inskripzioak, belaontzi motaren arabera 100 eta 150 euro artean balio du Merkeagoa maiatzaren 1a baino lehen gauzatuz gero). Interesatuek posta elektronikoz eska dezakete zeharkaldiaren gaineko informazio zabalagoa.
