Barruti bakoitzean 300 lagun eta seina autobus

1200 lagun saretu nahi ditu Pasaiako GEDek ekainaren 10eko giza katerako.

olatz mitxelena

2018/05/03

Antxorako helburuen aurkezpena, kultur etxean.

Gure Esku Dago-k datorren ekainaren 10ean osatu nahi duen giza katean Pasaiak bi kilometro osatu behar ditu, eta horretarako, gutxienez, 1.200 lagun saretu. Helburua lortu nahian lau barrutietan hasiak dira lanean, eta datozen egunetarako hainbat deialdi luzatu dituzte, barruti bakoitzak bete nahi dituen sei autobusak osatzea helburu. Trintxerpen, esaterako, bihar eta etzi kalera atera eta parte hartzeko prest dauden lagunen izen-abizenak jasoko dituzte. Bihar Serafin Esnaola plazan izango dira, arratsaldez, eta etzi, berriz, eguerdian, azoka inguruan. Datorren astebururako beste bi zita jarri dituzte: hilaren 11n, Azkueneko biribilgunean, arratsaldean, eta hilaren 12an, eguerdian, azokan. San Pedron, bihar, erronka Sanpedrotarrak ere hasiak dira saretze lanetan. Aurkezpena egina, partaideen zerrendan izen mordoxka bat bildu dituzte jada, baina ez nahikoak, eta gehiago biltzeko xedez, biharko erronka berri bat plazaratu dute. Frontoia bete nahi dute, Ni banoa eta zu bazatoz lelopean herri argazkia egiteko. 18:00etan da zita. Donibanen eta Antxon ere izango da izena emateko aukera. Antxon atzo egin zuten aurkezpena, eta han jakinarazi zutenez, datozen asteetarako iragarritako ekitaldi guztietan egongo dira izenak biltzen eta zapiak saltzen; Antxoberfest eta Sagaro Eguna tarteko.Tutoreak ere izendatuko dituzte, norbere inguruko lagunak saretzea helburu. Donibanen lehengo astean egin zuten giza katearen aurkezpena, eta han erabaki zuten hilaren 17tik 21era bitartean izango den Pasaiako Itsas Festibala bitartean ahalegin berezia egitea, gaiari ikusgarritasuna eman eta ahalik eta partaide gehien biltzeko asmoz.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.