[Galeria] Herriaren aitortza Jose Luis Ansorenari

Andra Mari Abesbatza, Musikaste eta Eresbilen sortzaile da beste askoren artean Ansorena. Ansorenari eta bere ekarpenari aitortza egin dio Errenteriak.

Ikerne Zarate Gartziarena

Errenteria-Orereta

2018/05/03

Ansorena, mendoza eta Urkulluren artean eserita atzoko omenaldian.

Jose Luis Ansorena omendu zuen atzo Errenteriak. Andra Mari Abesbatza, Musikaste, Eresbilen sortzailea da Ansorena, euskal musikagileen gaineko ikerketa ugari egin du, artikulu, liburu eta katalogo asko idatzi. Horiek batzuk baino ez dira, ibilbide emankorra egin duelako musikaren munduan barrena, ikerlari eta sortzaile emankorra izan da, eta merezitako omenaldia jaso zuen atzo, 90 urte bete zituen egunean. Julen Mendoza Errenteriako alkatea eta udal ordezkari ugari, Iñigo Urkullu Lehendakaria, eta Markel Olano ahaldun nagusiak egin zuten bat omenaldiarekin, baita Errenteria-Oreretako Karnaba Otxoteko, Zaria, Landarbaso, Andra Mari, Garrintzi, Hirusta eta Beti Bizkor abesbatzetako hainbat abeslarik, Udal Txistularien bandak, Ereintzako txistulariek eta Euskal Herriko Txistularien Elkartearen deiari erantzunez bertaratu ziren txistulariek. Euriak ere ez zuen kale egin, baina hamarnaka lagun bildu ziren jarri zuten karpa azpian. Omenaldi goxoa eta aitortza izan ziren atzokoak, eskertza ibilbide oparoari. Eresbilen zuzendari Jon Baguesek Ansorenaren ibilbidea laburtu zuen. 1966an Errenteriako Kaputxinoen komunitatera heldu zenean 38 urte zituen Ansorenak. Ordurako sortua zuen Iruñean San Antonio eskolania, eta gazteekin lan garrantzitsua egina zuen. Urte hartan bertan, Gaztedi, parrokiako gazte taldea osrtu zuen. Ondoren heldu zen Andra Mari abesbatza. Orereta eta Oinarri abesbatzak ere berak sortu zituen Andra Mariren barruan, baita Karnaba Otxotea biziberritu, eta Alaia emakumeen otxotea sortu. Ansorenaren lana eta ekarpen handiari eskertza 1973an sortu zuen Musikaste, Baguesek nabarmendu zuenez, “euskal musikaren iragana berreskuratzeko, eta 200 obra estreinatu ditu bertan”. Urtebete geroago sortu zuen Ansorenak Eresbil Euskal Musikaren Artxiboa. “Azken horrek 250.000 agiritik gora gordeta ditu, horietatik 30.000 partitura euskal konpositoreek sortuak dira”, azaldu duEresbilen zuzendariak. Euskal Herriko Txistularien Elkartea, abesbatzen federazioa eta euskal konpositoreen elkartearen sorkuntzak sustatu ditu Ansorenak, eta Eusko Ikaskuntzaren musika alorrean kolaboratu. Eskerrak eman zizkion atzoko ekitaldian Baguesek Ansorenari, “humanistikan zein musikan jasotako hezkuntza hezkuntza sendoak gizartearen zerbitzura jarri ditu Ansorenak. Gizarte nahasmen handiko uneetan borondateak eta ahotsak batzea lortu zuen, artearen edertasuna musikaren bidez lortuta. Hori guztiagatik, mila esker”. Ildo beretik mintzatu zen Mendoza, eta “eskerrik sentikorrenak” luzatu zizkion atzo Ansorenari. Atzokoa, Ansorenaren ibilbide pertsonal eta profesionalari omenaldia izan zela baina baita errenteriarrei kolektiboki egindakoa esan zuen, “kolektiboki gure buruari egiten diogun aitortza da, zurea gurea sentitzen dugulako, kolektiboki sentitzen dugulako. Zuk ereindakoa ez delako pertsonala, kolektiboa baizik”. Harrotasuna sentitzen dutela errenteriarrek erantsi zuen Mendozak, “ez zinen hemen jaio, baina bai hemen bizi, eta bizitza emankor horretatik utzi diguzu Andra Mari eta Eresbil, besteren artean, biak ala biak kolektiboak”. Ansorena balio “neurtezina” duen ondarearen sortzaile dela esanda, Errenteriari emandako guztia itzuli nahi ziola atzoko ekitaldiarekin herriak nabarmendu zuen alkateak, “bere memoria eta iragana gordetzeko gai ez den herriak, nekez eraikiko duelako etorkizuna. Agur Errenteria konposatu bazenuen ere, guretzako hemen zaude, beti izan zara eta beti izango zara. Herri honek, zuk emandako maitasun kolektiboa itzuli nahi dizu. harro gaude”. Abesbatzetako kideek eta bildutako txistulariek, Ansorenak sortutako Agur Errenteria abestu zuten ondoren. Olanok eta Urkulluk hartu zuten hitza Ansorenari egindako ekarpen handia eskertzeko. Musikarik gabeko herria, “arimarik, senik, nortasunik gabeko herria” dela esan zuen Lehendakariak, eta Ansorena “ekintzaile kulturala” izan dela erantsi zuen, “langilea, konprometitua, eskuzabala eta hurbila”. Ansorenaren hitzak dituen, eta musika armonizatu zuen Euskal Musikaren Gorespena abestu zuten oroigarria eman ondoren. Oroigarriarekin pozik, baina beste opari bat ere jaso zuen omenaldiarekin batera Ansorenak atzoko ekitaldian. Musika Plaza izena berak proposatu zuen, eta atzotik Jose Luis Ansorena Musika Plaza izango da. Atzokoa eskertza eta aitortza ekitaldia izan zen, baita Ansorenak Errenteriari egindako ekarpen handiaren zati bat behintzat, hari itzultzekoa. Bere urtebetetze eguna izanik, ezin zuten beste modu batean amaitu omenaldia, eta bildutako guztiek Zorionak Zuri abestu zioten Ansorenari.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.