Ondarean murgiltzeko gonbita

Larunbatean eraikinaren beheko solairuan dagoen erakusketa espazioa zabalduko dute. Errota tradizional baten eta ondare izan zen irin fabrikako elementuak ikus daitezke bertan.

Ikerne Zarate

Errenteria-Orereta

2018/05/03

Fanderiako Errota-Ibaiaren Etxeak larunbatean zabalduko ditu ateak.

Ingurumen eta kultura ondarean murgiltzeko gonbita egin du Errenteriako Udalak. Larunbatean (hilak, 5) zabalduko ditu ateak Fanderiako Errota-Ibaiaren Etxeak, eta herritarren iraganaren, orainaren eta etorkizunaren sinbolo bihurtuko da. Ibaia izango du protagonista nagusia, eta Errenteria-Oreretan industriak izan zuen indarra eta bilakaera erakutsiko du, XV. mendean Renteriola burdinolarako energia gisa erabiltzen baitzen. Burdinola hori urteekin bihurtu zen fanderia, errota eta irin eta pentsu fabrika, eta 1996an eten zuen industria jarduera. Larunbatean eraikinaren beheko solairuan dagoen erakusketa espazioa zabalduko dute. Errota tradizional baten eta ondare izan zen irin fabrikako elementuak ikus daitezke bertan. Fanderiako Errota-Ibaiaren Etxean haren historia, funtzionamendua, eta batez ere, Errenteriako ibai ondarea ezagutzeko aukera izango dute bertaratzen direnek. Larunbat, igande eta jaiegunetan izango da zabalik 10:00etatik 14:00etara, eta sarrera doakoa izango da. Bisita gidatuak ere egingo dituzte bertan, Itsas Gela elkarteak dinamizatuta, eta horietan, ehotzeko mekanismoak eta harriak martxan ikusteko aukera izango da. Taldeek hala nahi badute, ibilbide ekologiko osagarria egiteko aukera izango dute Oarsoaldeako Turismo bulegoan aurrez erreserba eginda edo 943 49 45 21 telefono zenbakira deituta. HITZAk erreportaje zabala argitaratuko du Fanderiako Errota-Ibaiaren Etxearen gainean biharko papereko edizioan.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.