Borrokatzea merezi duelako, berriz ere kalera
Gogor salatuko dute gaur jubilatu eta pentsiodunek, pentsioen gaineko azken ituna sinatu duten alderdi politikoen jarrera.
Duintasunak elkarretaratzea eta manifestazioa egingo du gaur 11:00etan herriko plazan. Borrokatzea merezi duela dio Duintasunak, jubilatu eta Pentsiodunen Gipuzkoako Elkarteak, eta gogor salatuko dute gaur, pentsioen gaineko azken ituna sinatu duten alderdi politikoen jarrera: “Onartezina da pentsio publikoaren eskubidea beren arteko negoziazioaren menpe jartzea. Gure pentsioak ez dira haiei komeni zaienean diru truk moduan erabiltzekoak”.
Pentsiodunen artean pobrezia “betikotu” nahi izatea leporatu diete, “ziria sartu” nahi izana, eta horren aurrean borrokara deitu dute, kaleak hartzera. pentsiodunen heren batek Lanbidearteko Gutxieneko Soldata baino gutxiago kobratzen du, eta %52k 1.000 eurotik behera. “pentsiodunak biztanleriaren %24 gara, eta sortzen den aberastasunetik %10 da gure onurarako”, jakinarazi dute, eta aberastasunaren banaketaren “bidegabekeria” agerian uzten duela horrek erantsi du Duintasunak, “emakumeentzat oso txarra den errealitatea ezkutatzen du, horien kasuan gizonen pentsioak baino %70 baxuagoak direlako”.
Pentsioen errebalorizazioa kontsumo Prezioen Indizearen araberakoa eta betiko behar duela ere esan du Duintasunak, emakumeen pentsioak gizonen pentsioekin parekatu behar direla “bazterkeriarekin amaitzeko”, eta Europako Gutun Sozialak ezarritakoaren arabera 1.080 euroko gutxieneko soldata, “pobreziaren aurka”.
“Aski dela” esan diote Eusko Jaurlaritzari, eta iruzur fiskala eta ustelkeriaren aurka borrokatzera deitu diote: “Ondasun handiei, enpresa, banku, monopolioei zergak handitu eta bildutako dirua hobe banatu. Hala ez genuke izango egun pentsioekin dagoen arazoa, konponduta legoke”. 
