Donibaneko elkarteek landu duten egitaraua aurkeztu eta festibalaren gaineko bere irakurketa azaldu dute.
Donibaneko elkarteek Itsas Festibalerako landu duten egitaraua aurkeztu dute.
Donibaneko kirol eta kultur elkarteek Pasaiako Itsas Festibalerako landu duten egitaraua publikoa egin dute, eta antolatutakoen berri ematearekin batera festibalaz egiten duten irakurketa plazaratu nahi izan dute.
“Donibaneko elkarteontzat Itsas Festibala hitzordu garrantzitsua izango da”, baietsi dute, eta beren parte hartzea “guztiok batera” erabaki dutela jakinarazi. Era berean, beren ekarpena “hiru ardatzetan finkatu” dutela plazaratu dute: “Euskarari bere lekua eta aitortza eskaintzea, ahozko zein idatziko komunikazioan”; “Itsas Festibala euskal kulturaren eta bertoko kulturgileen agerraldi foroa izatea”, eta “herritar xumeon inplikazioa eta parte hartze zuzena ahalbidetzea”.
Festibalaren “onurak herritarrentzat” izango direla sinetsita erabaki dute parte hartzea, eta osatu duten egitaraua “elkarlanean, herritik bertatik sortua eta herritar guztientzat egina” dela goraipatu dute.
Parte hartzeko deia
Deialdi zehatzak ere luzatu dituzte, lehena larunbaterako (hilak 12). Donibaneko kaleak atonduko dituzte Itsas Festibalerako, eta herritarrak parte hartzera animatu dituzte. Bigarren deialdia festibalaren lehen egunerako da. Hilak 17an, ostegunean,
L’Hermione-ri harrera egiteko arrantzalez edota baserritarrez janzteko deia egien dute. Herri bazkarira biltzeko gonbidapena ere luzatu dute, “fragata handien oihartzun arrabotsuarekin batera arrantza ontzi txikien ahotsa ere aditu dadin”. Hilaren 19an izango da, arraun elkartean eta txartelak ohiko tokietan daude salgai.
Kantu Jiran, Dantza Taldearen ikuskizuna, Maider Zabalegiren kontzertuan, estropadan, kalez kaleko musikaldietan, mapa zaharren erakusketa… guztiez gozatzeko deia egin dute.
Egitaraua:
Hilak 12, larunbata:
- 09:00: Elizataian, herriko txokoak apaintzeko.
Hilak 17, osteguna:
- 18:00: L’Hermione fragatari harrera, arrantzalez edota baserritarrez jantzita. Ondoren Batelera Dantza Piedadean.
- Mapa Zaharren erakusketa Ubera bibliotekan, egunero, Festibala bitartean.
Hilak 19, larunbata:
- 09:00: Diana herriko txistularien eskutik, eta dultzaineroak kaian barrena.
- 12:00: Kantu Jira, herritarri orori zabalik, Bonantzatik.
- 14:30: Herri bazkaria arraun elkartean.
- 17:00: trikitilariak herrian zehar.
- 19:30: Batel estropada.
- 22:00: Maider Zabalegiren kontzertua, Bizkaia Plazan.
Hilak 20, igandea:
- 09:00: Diana Konstantzia Musika Bandaren eskutik.
- 12:00: Donibaneko Lintxua dantza taldearen emanaldia.
- 17:00: Elektrotxufla herritik zehar.
