Hilaren 26an izango da lasterketa eta momentuz 600 lagunek eman dute izena parte hartzeko. Ostiralean amaituko da izena emateko epea.
Txasko, Jimenez, Orbegozo eta Egiluzeko bi ikasle gaurko aurkezpenean.
Familia artean eta kirolean. Hala jarri nahi ditu errenteriarrak Egiluze Ikastetxeak. Horretarako, Familia lasterketa antolatu du bigarrenez
Denok Batera iniziatibaren barruan. Leire Jimenez Egiluze ikastetxeko Zuzendari Pedagogikoak, Jexux Orbegozo ikastetxe bereko Kirol Mintegiko arduradunak, Jon Txasko Kirol zinegotziak eta ikastetxeko bi ikaslek eman dute gaur lasterketaren berri.
Hiru kilometro eskaseko lasterketa ez lehiakorra izango da, “ez da sailkapenik izango, lasterketaren helburua denok batera une dibertigarria pasatzea delako. Guztiok izango gara garaile”. Hilaren 26an egingo dute, 17:00etan hasiko da topaketa, eta ordu erdi beranduago abiatuko da lasterketa Xabier Olaskoaga plazatik, Morrongilleta, Esmalteria. Maria de Lezo, Herriko plaza, Erdiko kalea, Santa Klara kalea, Fanderia, Gabierrota ibilbidea, Santa Klara, Zumardia, Biteri Txiki, Pilotari kalea, Alfonso XI, eta Biteri kalea zeharkatuta, Xabier Olaskoaga plazan amaituko da.
Lasterketan edonork har dezake parte eta adinak ere ez du mugarik. Hornidura puntu garrantzitsua Zubia tabernaren aurrean izango da, eta helmugan ura eta fruta jasoko dute parte hartzaileek poltsa dotore batean. Ekintza osagarriak ere antolatu dituzte eta batukada eta txaranga arduratuko dira girotzeaz. Zumba masterclas saioa ere antolatu dute, lasterketa aurretik beroketa lanak egiteko, eta hura amaituta ere. Sari zozketa egingo dute amaituta, “gure kolaboratzaileek doan emandakoekin”.
Pozik azaldu dira Jimenez eta Orbegozo, momentuz 600 lagunek eman dutelako izena lasterketan parte hartzeko, “iaz baino 100 gehiago”, eta oraindik izena emateko epea zabalik dago ostiralera arte (hilak 18). Parte hartu nahi dutenek Egiluze ikastetxean edo Forumek Errenterian duen saltokian eman behar dute izena eta dortsala jasotzeko 2,50 euro ordaindu.
Parte hartzera animatu
Kirola heziketa proiektuaren ardatz dutela nabarmendu du Orbegozok, “lehiakortasunetik kanpo, talde lana eta parte hartzea indartu nahi ditugu. Adin guztietakoen artean aktibotasuna indartu nahi dugu, arratsalde dotore eta osasuntsua pasatzeko”. Horrekin batera, eta Errenteria herri aktiboa dela aintzat hartuta, beraiek ere ikastetxearen presentzia herrian bermatu nahi dutela gaineratu du Orbegozok.
Txaskok eskerrak eman dizkio lasterketa antolatzeagatik, “kirola eta osasuna sustatzeagatik”, eta herritar guztiak animatu ditu parte hartzera.
