Enbatarekin borrokan ari da 'L'Hermione', eta bihar ez da Pasaian izango

L'Hermione ontzia ez da izango esperotako datan Pasaiako Itsas Festibalean. Finisterre inguruan dago, aurrera egiteko zailtasun handiekin.

Urko Etxebeste

Pasaia

2018/05/16

‘L’Hermione’ ontzia, artxiboko irudian.

Asko zaildu zaio Pasaiako Itsas Festibalaren izar izan behar duen L’Hermione ontziari esperotako egun eta orduan badiara iristea. Are gehiago, festibalaren antolatzaileek ia guztiz baztertu dute bihar 18:00etan egongo dela ontzia Pasaian; orduan zen iristekoa herrira. Enbata ari du Finisterre inguruan, eta bertan zegoen atzo arratsean ontzia, aurrera egin ezinik. Horrek zeharo zaildu du ontziaren etorrera Pasaiara. Nabigatzeko egoera oso zail horren aurrean, behin Finisterre pasatuta, 36 orduko barealdia aurreikusi dute meteorologian adituek. Hori baliatuta, Itsas Festibala bitartean Pasaiara iristeko ahalegina egingo du ontziko eskifaiak, “baina oraingoz ezinezkoa da Pasaiara noiz iritsiko den zehaztea”. Antolatzaileek espero dute jaialdia bitartean iristea udalerrira. Belaontzia izanda, aldeko baldintzarik gabe ez da erraza ontziak aurrera egitea, “nabigazio eragiketa guztiak zuzentzen ari dira egoerari aurre egiteko”. Jaialdia bitartean ontzi barrura sartzeko jada 6.000 sarrera zeuden salduta. Antolakuntza prest dago, hala nahi duenari, sarreraren dirua itzultzeko. Gaur Donostian gaiaren gaineko argibideak emateko agerraldia egingo dute.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.