Fiskalaren akusazioak ukatu dituzte auzipetuek

Hirurek ukatu dituzte fiskalak egindako akusazioak, manifestazioan izan zirela, baina ondorengo liskarretan ez zutela parte hartu esan dute

Ikerne Zarate Gartziarena

Errenteria-Orereta

2018/05/21

Gazteen kontrako epaiketa saltzen duen kartela.

Gaur egin dute Oreretako hiru gazteen kontrako epaiketaren lehen saioa. Oreretako hiru auzipetuez gain, Beasaingo gazte bat ere epaitu dute Iruñeko gertakarien harira. Hiru oreretarrek deklaratu dute gaur Espainiako Auzitegi Nazionalean, eta fiskalaren galderei erantzun diete, baita defentsak egindakoei ere. Hirurek ukatu dituzte fiskalak egindako akusazioak, manifestazioan izan zirela, baina ondorengo liskarretan ez zutela parte hartu esan dute, eta proba gisa aurkeztutako argazkietan azaltzen diren gazteak direnik gezurtatu egin dute. Lau auzipetuek deklaratu dute gaur, eta haien ondoren atxiloketan parte hartu zuten poliziek deklaratu dute, baita atestatua egin zutenek. Perituak ere deklaratu du kalteen tasazioaren gainean. Etzi jarraituko du epaiketak. Bigarren saioa eta azkena izango du Oreretako hiru gazte eta Beasaingo baten kontrako epaiketak. Etzi, beste lekuko baten deklarazioa izango da eta ondorioen txanda helduko da. Joan den urteko martxoaren 11n atxilotu zituzten Oreretako hiru gazteak Iruñean egindako manifestazio baten ondoren izandako liskarren harira. Atxilotu eta bi egunera epaileak haiek espetxeratzeko agindua eman zuen. Zortzi hilabete egin zituzten espetxean eta azaroan gelditu ziren aske, behin behinean. Hasiera batean Nafarroako Auzitegiak hartu zuen auzia bere gain, baina “desordena publiko terroristak” akusaziopean Espainiako Auzitegi Nazionaleko Carmen Lamela epailearen eskutan gelditu zen auzia azkenik. Fiskalak zazpi urteko espetxe zigorra eskatzen du laurentzat.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.