Pasaia arte eszenikoetarako plaza

Bi kale antzerki programatu dituzte asteburu honetarako eta ekainaren 2an Haatik-ek 'Lau Eme' estreinatuko du Donibaneko plazan.

olatz mitxelena

Pasaia

2018/05/24

Martxoaren 8aren testuinguruan, Zirizan, Lau Eme piezaren entsegu ireki bat egin zuen Haatik konpainiak.

Bi kale antzerki izango dira asteburu honetan Pasaian, biak bihar eguerdian. Donibanen, Ubera Bibliotekaren inaugurazioa ospatzeko ekitaldien barruan Ados Teatroaren Xuxurlariak programatu dute. 12:30ean hasiko da emanaldia, Ubera Bibliotekan, eta Santiago plazan amaituko da, herria alderik alde zeharkatuta. Antolatzaileek jakinarazi dutenez, kale antzerki ibiltaria da, “komunikazio esperientzia poetikoa”. Taldea osatzen duten pertsonak bat-batean agertzen dira leku publikoetan, geltoki, merkatu edota festen erdian… eta hodi luze batzuen bitartez jendearen belarrietara olerki sekretuak xuxurlatzen dituzte. Oso bestelakoa da Trintxerperako programatutako antzezlana. Dr. Bubble & Mr. Fly haurrentzako umorezko antzezlan bat da, Dok eta Mak zientzialari leloak protagonista dituena. 12:30ean da ikuskizuna, Serafin Esnaola plazan. Musikaz Blai jaialdiaren barruko ekitaldia da. Haatik konpainiaren ‘Lau Eme’ Talde profesionalen antzezlanak soilik ez. Bihar (hilak 25), Donibaneko Ubera Bibliotekaren inaugurazio ekitaldiaren ondoren (19:00), Hamaika Buelta taldekoak ariko dira antzezle, kasu honetan biblioteka barruan. Eta antzerkiaz bakarrik ez. Dantzaz gozatzeko aukera ere izango da aurki. Haatik Dantza Konpainiak Lau eme estreinatuko du ekainaren 2an Donibaneko Santiago plazan (20:00). Hogei minutuko dantza pieza bat da, emakumearen ahalduntzearen gainekoa. Etxean estreinatuko du konpainia pasaitarrak bere azken lana, ondoren, biran hasteko: ekainaren 10ean Gasteizeko Kaldearte jaialdian izango dira, uztailaren 8an Arrasaten, uztailaren 10ean Bartzelonan eta abuztuaren 2,3 eta 4ean Libourneko FestArts jailadian.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.