Historiarekin hitzordua Plazetan

Allerruk Erregional Ohorezko Mailara igotzeko 90 minutu behar ditu. Horietan, kanporaketako lehen partidako emaitza ahaztu, eta irabazi behar du.

Urko Etxebeste Petrirena

Lezo

2018/05/25

Dena alde du Allerruk, baina tentuz ibili behar du. Argazkia: Esteban Mitxelena.

2004an igo zen azkenekoz Allerruko gizonen taldea Erregional Ohorezko Mailara. Ustekabean izan zen, 2004ko uztailean esan zieten lezoarrei, hainbat gai tarteko, maila horretan jokatzeko eskubidea zutela. 2004/2005 sasoian bertan jaitsi egin zen berriz ere taldea, sasoiaren planifikazio epe eskasak eragin zuzena izan zuen horretan. Bihar, larunbata, Gipuzkoako lehen ligara igotzeko aukera dute zuri-berdeek. Aukera asko dituzte, hobe esanda. Igoerako kanporaketa oso-oso bideratua dute joaneko partidan Tolosa Bren zelaian 0-3 irabazi zutelako. Aurten bai. 18:30ean hasiko da itzuliko norgehiagoka. Festa kutsua izango du Plazetak. Jokalariak ez dira hortaz asko kutsatu behar, behar adina soilik. Zaleen indarra egindakoa berresteko baliatu behar dute, eta ahal bada, partida bera irabazteko. Baina handikeriarik gabe, Tolosa B zerbaitegatik dagoelako kanporaketa horretan, eta 0-3 aurretik joan arren, gehiegizko konfidantza kaltegarria izan daiteke Allerrurentzat. Bilbon izango bagina, gabarra famatua prest legoke dagoeneko. Allerruko zuzendaritzako kideek Pasaian dagoen L’Hermione ontziko arduradunekin hitz egin dezakete igoeraren ospakizun xelebre bat egiteko. Baina handikeriarik ez: Allerruren ezaugarrietako bat delako kontrarioarekiko errespetua eta begirunea. Gazte Maila Nagusien taldea bakarrik ez. Allerruren Gazte Mailako A taldea igoera promozioarekin hasiko da asteburu honetan. Zehazki, kanporaketa horretako lehen partida bihar bertan, nagusien taldearen aurretik, jokatuko dute Plazetan (16:00). Hondarribia A izango dute aurrean. Itzulerako norgehiagoka Hondarribian jokatuko dute hurrengo asteburuan.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.