Energiaren kontsumo arduratsuaz tailerra
Argituz egitasmoa aurkeztu dute gaur Lezon
Energia kontsumoa murriztu eta eraginkortasun handitu asmoz, Gipuzkoako Foru Aldundiak, iaz, Argituz egitasmoa jarri zuen martxan, eta gaur programaren aurkezpena egin dute Lezon, udaletxeko pleno aretoan, Lezoko alkatea Jesus Maria Martiarena eta ingurumen diputatu Jose Ignacio Asensio bertan zirela.
Han azaldu dituzte ostegunerako (hilak 31) antolatu duten doako tailerraren nondik norakoak. 18:00etan izango da kultur aretoan eta nahi duen orok parte har dezake (lekua bete artean behintzat). Antolatzaileek interesdunei beren etxeko edota establezimenduetako fakturak eramateko aholkatu diete, horiek aztertuta esango baitiete potentzi, kontsumo edota tarifa egokian aukeratuak ote dituzten.
Asensiok nabarmendu duenez herritarren artean “informazio eta formazioa” zabaltzea da egitasmoaren helburua. Horregatik, besteak beste, tailerrean, kontsumoen gaineko datu guztiak nola eskuratu daitezkeen erakutsiko dute.
Energia menpekotasun handia
Asensiok emandako datuen arabera Euskal Autonomia Erkidegoan kontsumitzen den energia guztiaren %97 esportatua da. Arazoa, zentzu horretan “estrukturala” dela uste du ingurumen diputatuak, eta horregatik iritzi dio oso garrantzitsua kontsumo arduratsuari.
Berau bultzatze aldera antolatzen dituzte herri-herri Lezon etzi eskainiko duten moduko formazio tailerrak, eta ez soilik hori, gida praktiko bat ere argitaratu dute, kontsumoa aurrezteko aholkuekin.
Tailerrean parte hartzeko aukerarik ez izatekotan, online tutorialak jarri dituzte sarean eskuragarri, eta azkenik, Energia Azoketan aurrez aurreko aholkularitza eskaintzen dute.
