'Irria harro!' kantaren bideoklipa grabatuko dute haurrek

Irria harro! kantua errealitate bihurtu dute, eta bideoklipa sortu nahi diote orain, txupinazo txikiaren jai giroa eta herrian haurrek duten presentzia transmititzeko.

Ikerne Zarate

Errenteria-Orereta

2018/05/29

Txupinazo Txikiak arrakasta handia izaten du.

Haurrek madalenetako kantu berria egin nahi zuten, eta eskaerari erantzuteko martxan jarri zen OarsoIrrien komunitatea. Joan den martxoan egindako dinamikak abiapuntua jarri zuen, eta ondoren osatu zen kanta berriaren letra. Doinuaren eta instrumentalizazioaren lanketa heldu zen ondoren, ahotsen grabaketak, eta amaitzeko, edizioa. Irria harro! kantua errealitate bihurtu dute, eta bideoklipa sortu nahi diote orain, txupinazo txikiaren jai giroa eta herrian haurrek duten presentzia transmititzeko, eta horretarako hitzordua jarri du OarsoIrriak komunitateak: ekainaren 8an (ostirala) egingo dute 17:30ean Herriko plazan. Txupinazo txikiko batukada herrikoian erabilitako instrumentuak eramatera deitu dituzte parte hartzaileak, eta grabaketarako, herriko familiak nahi dituzte: haurrak, gurasoak, aiton-amonak, osaba-izenak… Herriak sortu eta biziko duen aisialdiaren aldeko apustua egiten du OarsoIrriakek, eta sortutako iniziatibak, modu herrikoi eta parte hartzailean lantzen dituzte, auzolana uztartuta. Euskarak, parekidetasunak, ingurunearekiko begiruneak eta elkarkidetasuna dituzte oinarri, besteak beste. Herriko familiek urteetan izan duten presentzia garrantzitsutzat jo du OarsoIrriak komunitateak, “zuzeneko dinamiketan parte hartuz, edo hartzaile moduan, Arramendiko Irribaratzearen lagunartean, batukada herrikoian, inauterietako konpartsan edota tailer batean edo bestean parte hartuz aritu zaretenona”. Kantu berria ezagutzera deitu ditu orain familiak, eta bideoklipa egiteko prozesuan parte hartzera, “protagonismo kolektiboa josi nahi dugu, animatzen al zara?’.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.