Auzokonposta gune berririk ez du egingo udalak, udalaren esanetan aztertu diren kokalekuek ez zituztelako behar adinako baldintzak betetzen.
Errekaldeko ekarpen gunea.
Lezoko Udalak jakinarazi du Errekaldeko ekarpen gunea handitu egin duela, bikoizteraino. Herritarrek hondakinak uzteko erraztasun handiagoa izango dute horrela. Aldiz, udalak adierazi du herrian ez direla auzokonposta egiteko gune gehiago jarriko, aztertu diren kokapenak ez zirelako egokiak, eta dauden guneek konposta egiteko aukera bermatzen dutelako.
Errekalden, maldaren behealdean jarri dituzte edukiontziak. Maldan gora daudenen osagarri izango dira. Batez ere adinekoei begirako neurria izan da, zailtasunak baitzituzten hondakinak maldan gora igo, eta hango edukiontzietan uzteko. Udalak azaldu duenez, hasiera batean behealdeko eremuan ez zituzten jarri edukiontziak, kamioiak bertara iristeko zailtasunak zituelako: orain, beheko hondakinak gora eramango dituzte, han kamioiak den-denak jaso ditzan; San Marko Mankomunitatearekin adostutako neurria izan da, herritarrei erraztasunak emateko.
Errekalde auzoan txukunketa lanak egingo dira aldi berean aurten, argiteria berrituz eta parkina eginez besteren artean. Aldundiarekin elkarlanean egingo dituzte lan horiek.
Auzokonposta gune berririk ez
Udalak bidalitako oharrean,
Lezon Ondo Ai Ginen taldeari erantzunez, Gillermo Lazon kalean egitekoa zen auzokonposta gunearen gaineko azalpenak eman ditu. San Pedro-Pysbekoa kendu ondoren, udalaren asmoa izan zen Gillermo Lazonen gune berria egitea. Baina udalak egindako azterketen harira —Gillermo Lazonen eta beste eremu batzuetan aztertu dute non jarri San Pedron kendutakoa—, erabaki du gune berririk ez egitea. “Gillermo Lazoneko kokalekua baztertu egin zen bertan arratoi arazoak zirelako, eta gauza bera gertatu da aztertu diren beste zenbait lekurekin, Euskal Herria plaza kasu”. Udalaren asmoa “herritarren ongizatea bermatzea” denez, osasun eta garbitasun arazoak ekidin asmoz hartu du auzopkonposta gune berriak ez egiteko erabakia.
Horrez gain, Gillermo Lazonen bertan gunea jartzeko hainbat kokaleku aztertu direla jakinarazi du udalak, baina baztertu egin direla, eskolatik, skate parketik, bertako jolasgunetik edo kiroldegitik hurbilegi zeudelako.
Aldi berean, auzokonposta egiteko aukera herrian bermatua dagoela nabarmendu du udalak. Azaldu du iaz Andreoneko gunea handitu zela, eta aurten Arretxenekoan gauza berbera egingo dutela. Eta hainbat daturen berri eman du: berriki auzokonposta egiteko nahia zortzi familiak agertu diote udalari. Baina udal erakundeak esku artean dituen datuen arabera, azken bi urtean 23 familia gutxiago daude zeregin horretan. 2015ean 95 familia ziren auzokonposta egiten zutenak; 2016an 82, eta iaz 72. “Beraz, gune berria sortzen ez bada ere, auzokonposta egin nahi duten herritar eta familia guztiek aukera bermatua dute, egun dauden guneetan hori egiteko aukera dutelako”.
Auzokonposta egiteko bost gune daude egun Lezon: Andreonen, Altamiran, Aralarren, Arretxene-Txulotxon, eta Lopenen.
