Touringek gizarteratu du bere proiektua

100 lagunetik gora hartu zuten parte Touringek zuzendaritza berria aurkezteko eta lan ildoak azaltzeko egin zuen batzarrean.

Ikerne Zarate

Errenteria-Orereta

2018/06/01

100 bazkide, jarraitzaile eta gurasok baino gehiagok hartu zuten parte atzoko batzarrean.

Touring Kirol Elkarteak zuzendaritza berriaren aurkezpen publikoa egingo zuen atzo. Duela hilabete inguru hartu zuen zuzendaritza Touring Berria plataformak proposatutako taldeak eta orain, proiektuaren ardatz nagusiak aurkeztu dizkie herritarrei. Zuzendaritza taldea aurkezteaz gain, proiektuaren ildo nagusiak, eta kirol arloko organigramen berri eman zuten atzoko batzarrean. Touring Kirol Elkarteko bazkide, guraso, jarraitzaile, zein taldea maite duten herritar guztiak deitu zituzten batzarrera, eta deialdiak izan zuen erantzuna, 100 lagunetik gora bete zuten Niessen auditorioa eta balorazio positiboa egin du Asier Yerobi presidenteak, “jarraitzaile eta bazkide ugari azaldu ziren batzarrera, gurasoak, zoritxarrez nahi genuenak baino gutxiago izan ziren, baina orokorrean primeran joan zen batzarra eta balorazio positiboa egin dugu”. Ilusioa piztu nahi zuen zuzendaritza talde berriak, Touring bere garai onenetara itzuli. Lehenengoa lortu dute dagoeneko eta pozik azaldu da Yerobi, “ilusioa piztu dugulako jarraitzaile, zale eta bazkideen artean”. Realeko kontseilari Alex Uranga eta Oarsoaldeko koordinatzaile David Ortega ere izan ziren atzoko batzarrean. Yerobik berak azaldu duenez, Realak balorazio positiboa egin du Touringarekin hasitako harremana, baita atzoko bileraren gainean ere. Hurrengo urratsa zein den ere argi du Yerobik, Touring Kirol Elkartearen zuzendaritza talde guztiak bezala, “lanean jarraitzea hurrengo denboraldiari begira kluba sendotzeko, taldeak eta entrenatzaile plantilla osatzeko. poliki goaz, baina bagoaz aurrera”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.