Hilaren 18ra arte izango dute interesdunek izena emateko aukera, eta baldintza batzuk bete beharko dituzte.
![](http://oarsoaldea.hitza.eus/site/files/2018/06/madalenak.txupinazoa.jpg)
Hilaren 18ra arte eman dezakete izena laguntzaile izan nahi dutenek.
Madalenetarako laguntzaileak hautatuko ditu udalak urtero bezala lana egiteko, eta horri begira zabalik du
izena emateko epea. Hilaren 18ra arte izango dute interesdunek izena emateko aukera, eta baldintza batzuk bete beharko dituzte: 18 urteak beteak izatea kontratuaren hasierako datan; langabezian egotea kontratuaren hasierako datan; gutxienez, eskola graduatua izatea; eta euskaraz elkarrizketa bat izateko gauza izatea.
Azken horren harira, hautatuak diren pertsonak deituko dituzte Udal Euskaltegian elkarrizketa bat izateko. Ez dute elkarrizketa hori egin beharko hirugarren hizkuntz eskakizuna edo baliokidea egiaztatuta dutenak, edota 2011 eta 2017 urteen artean helburu bererako deialdian parte hartu eta euskara frogak gainditu zituztenek.
Halaber, lehentasuna izango dute Errenterian gutxienez hiru hilabete erroldatuta daramatenek. Hilaren 27an egingo dute zozketa, eta udal web orrian zein iragarki oholean jarriko dituzte emaitzak.
Interesdunak Zu! Zure Udala zerbitzuan aurkeztu behar dituzte eskaerak nortasun agiria, titulu akademikoa, eta euskarako tituluaren fotokopiarekin (daukatenek) batera. Zozketan hautatuak izan diren pertsonei eta lehenengo hamar ordezkoei posta elektronikoz mezua bidaliko diete beharrezko informazio guztiarekin zozketaren egunean bertan eta hurrengo egunean.