'Ametsen bidea' musikala igandean egingo dute Fatimako elizan. Kontariko, Bizaraingo, Koldo Mitxelenako eta Orereta Ikastolako 130 bat haurrek egingo dute.
Gaur aurkeztu dute Fatimako elizan ‘Ametsen bidea’.
Hilaren 10ean, igandea, 19:30ean eta Fatimako Andra Mariaren elizan, errepikaezina izango den ikuskizuna ikusteko aukera izango da, Ametsen bidea musikala. Errepikaezina izango da behin egingo delako, eta ikuskizuna osatzeko sortu diren sinergiak eta indarrak berriz ere biltzea zaila izango delako. 130 bat neska-mutil,
Kontari egitasmoko kideek gidatuta —Landarbaso Abesbatzaren barruko egitasmoa da—, Josu Elberdin pasaitarrak sortutako
Ametsen bidea ipuin musikatuko bost zatiak 15 ataletan kontatzen, abesten, transmititzen izango dira.
Neska-mutilak Kontarikoak eta Bizarain, Orereta Ikastola eta Koldo Mitxelenakoak izango dira. Asier Oruesagasti aktoreak egingo du narrazioa; partaideen interpretazio lana garatzen ere lagundu du aktoreak. Ikuskizun handia izango da, joango direnen memorian errepikatuko dena aurrerantzean. Sarrerak salgai daude jada: aldez aurretik Niesseneko leihatilan, egunean bertan saioa hasi baino ordubete aurretik Fatimako elizan. Helduen tiketak 5 euroko prezioa du, haurrenak 2koa.
Istorio bat kontatuko du
Ametsen bideak-ek. Haurrek amestu eta ametsaren bitartez nahi duten mundura bidaia egin dezaketela sentiaraztea izango da horren oinarria, abestien, mugimenduen bidez. Istorio bat kantatuz kontatuko dute, edozertarako gai direla sentitzeko eta hori publikoari helarazteko. Zorterik ez duten gazteen bizipenak kantatu/kontatuko dituzte, baina bizitzak emandako aukera batek fantasiazko mundu zoragarri batera bidaia egitea ahalbidetuko die.
Izan ere, egitasmoaren, ikuskizunaren helburuak direlako neska-mutilek euren buruaz duten irudia, autoestimua eta energia lantzea; konfiantza areagotzea abesten ez duten haurrei horretarako gai direla ikusarazteko; eta horretarako abestia eta mugimendua erabiliko dituzte, sentimenduak eta bizipenak transmitituz, eta ahotsaren bidea landuz.
Ikuskizun osoa
Kontariko, Bizaraingo, Orereta Ikastolako, eta Koldo Mitxelenako partaideak 7-10 adin tartekoak izango dira; bakoitzak aukeratu du zein abesti egin bere eta zein pertsonai landu beraz. Hamabost mugimenduetako bakoitza ezinbestekoa izango da osotasuna ulertzeko, zati bakoitzak emango dio zentzua emankizunari,
Ametsen bidea-ri.
Pantaila erraldoia, argiztapen berezia, soinu sistema ikusgarria, Asier Oruesagasti narratzailea… “Zer kontatzen dugun inporta zaigu, parte hezitzaileari garrantzia ematen diogu”, esan du gaurko musikalaren aurkezpenean Kontariko zuzendari Maddalen Dorronsorok. Hau da, ikuskizunak osagarri guzti-guztiak ditu 70-80 minutu atsegin, gozamenez beterikoak, izateko. Eta balioetan oinarrituta gainera, ametsek ere balio dutelako, haurrengan batez ere, izan nahi denera hurbiltzeko.
Dorronsororekin batera gaurko aurkezpenean izan dira Iñaki Tolaretxipi Landarbaso Abesbatzaren zuzendaria, Asier Oruesagasti aktorea; eta Amaia Etxebeste Koldo Mitxelenako zuzendaria, Edurne Soroa Bizaraingo ordezkaria, eta Alaitz Lete Orereta Ikastolako kidea.
