Gaztedi Txikik antolatzen duen kanpalekuak 40 urte bete ditu aurten. Horren harira, 40 urte horiek utzitako bizi esperientzia bildu nahian, argazki erakusketa antolatu dute Xenpelar Etxean.
Collar, Moriones, eta Mujika.
Gaztedi Txikik antolatzen duen kanpalekuak 40 urte bete ditu aurten. Horren harira, 40 urte horiek utzitako biz esperientzia bildu nahian, argazki erakusketa antolatu dute Xenpelar Etxean. Atzo inauguratu zuten erakusketa, eta astelehenetik ostiralera bisita daiteke aste honetan eta datorrenean, 17:00etatik 20:00etara.
Erakusketaren aurkezpenean izan ziren Unai Moriones kanpalekuaren egungo koordinatzailea, Felipe Mujika 1978an kanpaleku horren sortzaile izan zena, eta Ion Collar Kultura zinegotzia, kanpalekuetan parte hartutakoa eta begirale ere izandakoa Gaztedi Txikin. Burgosko Quintanar herrian du aspaldian basea Gaztedi Txikiren kanpalekuak, eta bertatik, 40 urte hauetan, ehunka eta ehunka haur eta gazte pasa dira. Mujikak hasierako garaiak ekarri zituen gogora: “Ez genuen esperientziarik, ezta begirale titulurik garai hartan eta okurritu zitzaigun kanpalekua antolatzea. Lana boluntarioa zen, eta genituen bitartekoak urriak”. Bitartekoak ez, baina bai ilusioa. ilusio horrek zehazki, bultzatu zituen kanpalekuarekin jarraitzera, hobetzera, eta esperientzia aberasgarri askorekin batera, gogorren bat ere izan zuten: “Horietako batean sukaldea genuen egiturak su hartu zigun. Ez geneukan diru askorik, ezta bitartekorik baina kanpalekuarekin aurrera egitea erabaki genuen”.
Mujika eta bera bezala lan boluntarioa urteetan egiten ari ziren lagunen lekukoa belaunaldi berriek hartu dute. Horrela bete ditu 40 urte kanpalekuak, beraiek Kanpa deitzen duten horrek. Morionesek zehaztu zuen egun baliabide gehiago dituztela, eta ziurrenik duela 40 urte baino errazagoa dute antolatzea. Gaur egun lan horietan ari direnak, kanpalekuetatik inoiz pasa diren haurrak izan ziren, eta beraien lana ere boluntarioa da.
Erakusketarekin 40 urte horiek ospatu nahi dituzte, eta irudiz jantzi, argazkiz, eta horien atzean dauden une goxoz. Herrian erreferentzialak diren talde eta eragileak daudela esan zuen Collarrek, “horietako bat da Gaztedi. Nik ere parte hartu nuen bertan, haurra nintzela izan nintzen bertan, gero begirale bihurtu nintzen, eta atzera begira, urte haietako esperientzia erabat aberasgarria izan zen zalantzarik ez dut. Lehen parranda, lehen musua… Kanpa horien sinonimoa da beste askoren artean, eta esperientzia zoragarria”.
Argi dute antolatzaileek, “beste 40 urte betetzeko prest gara”.
