Kultura politiko demokratikoaren gainean egindako azterketa sozializatzea du helburu aldundiak.
Aztikerren ordezkaria, diputatu nagusia eta alkatea, atzoko saioa hasi aurretik.
Gipuzkoako Foru Aldundiak kultura demokratikoan sakondu nahi du, eta horri begira lanketa berezia egin du. Hausnarketa egin eta kultura demokratikoaren gaineko plangintza egiten hasi da, eta plangintza horretako pausuetako bat eman zuen atzo Errenteria-Oreretan. Julen Mendoza alkateak eta Markel Olano diputatu nagusiak eman zuten atzo iniziatibaren berri, alderdi politiko ezberdinetako ordezkarien eta herriko eragileen aurrean Reina aretoan. Azterketa egin duen Aztikerrek eman zituen xehetasunak.
Herritarren pertzepzioak jasotzea izan da lehen lana, azterketa egitea bigarrena, eta orain hura jendartera zabaltzea du helburu aldundiak, elkarrizketarako urratsak egiteko. Atzo Errenteria-Oreretan egindakoa azken saioa izan zen, eta aurretik, Arrasate, Tolosa eta Lasarte-Orian izan dira. Hurrengo urratsa hezkuntzan egin nahi du aldundiak.
Kultura politiko eta demokratikoaren gaineko hausnarketak egitea eta horiek konpartitzea garrantzitsutzat jo zuen Mendozak, “erabakiak hartzeko orduan, bai udal politikan zein bestelako politiketan ere, debateak sortzea garrantzitsua da”.
Olanok iniziatibaren testuingurua azaldu zuen. Transformazio garaiak bizi dituela Euskal Herriak esan zuen, “batik bat gatazka armatu bat izan dugu eta hori transformatzen joan da, bideratzen joan da. Maiatzean bertan ETA erakundeak argitara eman zuen bere jarduera disolbatuko zuela, eta horrek urrats bat gehiago ekarri zuen. Horrekin ez da amaitu, ordea, hainbeste urteetan sortu duen harreman gaiztoa edo gorrotoa. Horrek ikuspegi politikotik du bidea, baita ikuspegi sozialetik ere”.
Aldundiaren helburua, beraz, herriz herri, kalez kale dinamika bat martxan jartzea izan da hori guztia bideratzeko, Olanok azaldu zuenez. Bizikidetza Martxan programa abiatu du aldundiak horretarako, “transformazio horri behar den bezala erantzuteko eta bizikidetza indartzeko gure herrian. Horri beste zerbait gehitu behar zaio. 2015ean inkesta bat egin genuen, eta horretan jendeak esan zigun ikuspegi ekonomikotik etorkizunarekin kezka zeukala, baina batez ere, ikusten zutela beharra aldundiak kalearekin zuen harremana aldatzeko. Erakundeekiko konfiantza krisi bat zegoela erakutsi zigun horrek”.
Horri aurre egitea ere beharrezko ikusi zuten eta gizarte osoa lanean jarri nahi izan dute kultura politikoa aztertzen. Prozesu guzti horren berri eman zuten atzo, “egin dugun azterketa partekatu nahi dugu herrietan eta bailaretan. Erakundeetan gaudenok ardura dugu, eta jendearen atxikimendua lortu behar dugu. Jendeak oro har atxikimendua dauka arlo sozialarekiko, eta ez horrenbeste politikoarekiko, eta gure obligazioa ikuspegi politikoa, erakundeak, jendeak bere jotzea eta haiekin identifikatzea da, eta une honetan, hori ez da gertatzen”.
