Arroza kozinatzeko hamaika modu daudela eta denak aberasgarriak direla erakutsiko dute, osagarri eta beharrezko, aniztasun kulturala beharrezkoa, eta aberasgarria den moduan.
Munduko Arrozak egingo dute zazpigarrenez, larunbatean Zumardian.
Munduko Arrozak antolatu du SOS Arrazakeriak zazpigarrenez. Larunbatean egingo dute kultur eta jatorri aniztasuna aitortzea helburu duen elkartasun jaia Zumardian, eta Nigeria, Aljeria, Nikaragua, Kolonbia, Brasil, Pakistan, Nepal, Armenia eta Euskal Herriko arrozek izango dute tartea. Gaur eman dute jaialdiaren berri, Rima Budaghian armeniarrak, Errenteriako Aljarafe elkarteko Carmen Gomezek eta Teresa Siguenzak, Maria Izquierdok eta SOS Arrazakeria elkarteko kide Tina Diazek. Arroza kozinatzeko hamaika modu daudela eta denak aberasgarriak direla erakutsiko dute, osagarri eta beharrezko, aniztasun kulturala beharrezkoa, eta aberasgarria den moduan.
Arroza izango dute batura elementua, eta herri bakoitzeko ordezkariak bere modura prestatuko du, norberaren jatorri kulturaren aldarri. Pertsonak berdinak izango diren komunitate bakarra osatu nahi dute, bakoitzaren identitate eta kulturari leku emanez.
Topaketa eremu hori ezinbesteko dela esan du SOS Arrazakeria taldeak, elkarri ezagutzeko, iritsi berrien, zein aurretik etorri zirenen aitortzarako eremu ere izan nahi du. Pertsonen arteko harremanak estereotipo eta aurreiritziekin eraikitako harresiak suntsitzeko baliatu nahi ditu, eta pertsona errealen arazo errealetara heltzeko, “ez imajinatzen ditugunetara”.
Migranteek, migrante izate hutsagatik bizi dituzten zailtasunak jarri dituzte agerian gaurko agerraldian: “Zailtasun gehiago dituzte etxebizitza edo lana izateko. Alokairuen kasuan, etxebizitzen jabeek askotan uko egiten diote horiek atzerriko pertsonei alokatzeari, edota alokairu gehiegizkoak kobratzen dizkiete. Berdin jokatzen dute alokairu agentzia ugarik”.
Langabeziari ere erreparatu diote eta datu bat eman dute, “langabezia %10ean kokatzen da orokorrean, baina migranteen kasuan %36koa da. lana egiten dutenen artean, berriz, lan prekarioak, eta etxeko langileen kasuan gehiegikeri egoera onartezinak ematen dira”.
Munduko arrozak gozamenerako espazioa da, baina batez ere, elkartasunerako eremua, eta bertan parte hartzera deitu dituzte herritar guztiak.
11:30ean hasiko dira parte hartzaileak arrozak prestatzen, eta aurretik aipatutako zortzi herrialdetako ordezkariez gain, Errenteria-Oreretako Grupo Oarso Taldeak, Aljarafe Elkarteak, Lau Haizetara Euskaltzaleon Topaguneak, AEK-k, Kolore Guztiak, eta Donibaneko Yola elkarteak ere hartuko dute parte. Arrozen dastaketa, berriz, 13:30ean hasiko da, eta arroza bukatu arte jarraituko du festak. Musika eta haurrentzako jolasak ere izango dira.
