TAO zerbitzuan ari ziren bederatzi langileen alde egin dute epaitegiek lehen instantzian. Udalak helegitea jarri die ebazpen horiei.
TAO zerbitzuko langile ohien agerraldia gaur ELAren egoitzan.
Abenduan amaitu zuen udalak TAO zerbitzua ematen zuen enpresarekin hitzarmena, eta orduan publifikatu zuen eta bere gain hartu aparkalekua arautzeko zerbitzu berria. Langile ohiek epaitegietara jo zuten, eta sei hilabete ondoren heldu dira ebazpenak. TAO zerbitzuan ari ziren bederatzi langileen alde egin dute epaitegiek lehen instantzian, udalak epai horiei helegitea jarri dielako Euskal Autonomia Erkidegoko Justizia Auzitegi Nagusian.
Epaiak esku artean, agerraldia egin dute gaur TAOko langile ohiek haien gaineko balorazioa egin, eta udalari, eseri eta gaiaren gaineko irtenbide duin bat eskatzeko. ELAren egoitzan egin dute agerraldia eta Irune Moreno mintzatu da TAOko langile ohien izenean: “Epaiketak amaituta, salbuespenik gabe epai guztiek diote kaleratzeak bidegabeak izan direla eta udalak duela erantzukizuna. Hasieratik aldarrikatu dugu hori, baina orain are eta tinkotasun handiagoz esan dezakegu udalak publifikazio prozesua beste modu batera egin zezakeela eta gure lanpostuak manten ziztekeela”.
Lehen instantzian emandako ebazpenen arabera, hiru langileren kasuan ezingo du udalak kalte-ordainak ordaindu, eta derrigorrean berrartu beharko ditu. Beste sei langileen kasuan (bederatzi dira) langileak berrartu edota kalte-ordaina emateko aukera izango du udalak. Horren harira udalak hartu duen erabakia gogor salatu dute, “langile guztiok berrartzeko erabakia hartu beharrean, kalte-ordainak abonatzeko aukerari heldu dio, epaiek horretarako aukera ematen duten kasuetan. Lanpostuak bermatu beharrean, aukera hobea iruditu zaio, funts publikoetatik ia 700.000 euro ordaintzea”.
Berrartu behar dituen langileen kasuan ere salatu du Morenok udalaren jarrera, “berrartuko ditu hiru langile horiek, beste aukerarik ez duelako, baina guretzako lanposturik ez duela argudiatuz. Soldata ordainduko digu, inolako lanik egin gabe, lanera joan gabe soldata ordainduko digula, alegia”.
Langile ohien lanpostuen defentsa baino aukera hobeagoa iruditu zaiola “dirua xahutzea” erantsi du Morenok, eta herritar gisa azken hori “onartezina” iruditzen zaiela, “bidegabekeria baten ondorioz guztiok gure poltsikotik ordaintzea bidegabea delako. Langile garen neurrian, izugarri larria iruditzen zaigu udalak lanerako dugun eskubidea ukatzea. Lan egin nahi dugu, lanpostuak berreskuratu baldintza duinekin, eta ez herritik datorren dirua jaso ezer ez egitearen truke”.
“Larritzat” eta “surrealistatzat” jo du egoera Morenok, eta horren aurrean eseri eta irtenbide duin batera heltzeko galdegin dio udalari, “ez dugu uste ez langileok, ezta herritarrok ere halakorik merezi dugunik”.
Ebazpenak ez dira irmoak udalak helegiteak jarri dituelako, eta sententzia horien zain daudela orain azaldu du Morenok, “ez dakigu noiz helduko diren, baina lau hilabeteren bueltan helegite horien erantzuna izango dugula uste dugu”.
