Elizalde Dantza Taldeak 15 urte bete ditu aurten. Atzo (ostirala) ikasturte bukaerako dantzaldia egin zuten Done Eztebe plazan.
![elizalde.barrua](http://oarsoaldea.hitza.eus/site/files/2018/06/elizalde.barrua.jpg)
Elizaldekoak, alai dantzan Done Eztebe plazan.
Atzo (ostirala), Elizalde Dantza Taldeko kideek emanaldia egin zuten Done Eztebe plazan. Ikasturtean egindakoaren berri eman zuten taldeko haur eta gazteek, baita HHko 4. eta 5. mailakoek ere. Alboan Lartaungo txistulariak eta Auntxa trikiti taldeko kideak izan zituzten dantzariek musika jartzen. Giro ederra sortu zuten plazan. Urte bukaerako festarako prestatu zuten
Erre zenituzten (Xabi Solanoren pieza da) doinuarekin egindakoa ere berriz ere dantzatu zuten, plazan.
Elizalde Dantza Taldeak 15 urte bete ditu aurten. Haur asko pasatu dira bertatik, eta Elizalderen izena herriz herri eraman dute. Aurten, esaterako, 42 haur izan dira taldearen partaide. 15 urte dira taldea sortu zutela, eta Guraso Elkartearen ekimenez, gainera, badira 8 urte HHko 4. eta 5. mailetako geletan euskal dantza ematen dutela.
Astean hiru egunez ematen dituzte bertan dantza eskolak Izar Etxeberriak eta Maddi Nazabalek, ostiraletako saioan Nagore Ugaldebereren laguntza dutela. Urtetik urtera, dantza berri gehiago ikasten dituzte.
Urtean zehar saio asko ematen ditu Elizalde Dantza Taldeak, eskolan, herrian eta herritik kanpo. Ikastetxe barrukoen artean aipatu behar dira San Tomas Egunean eta ikasturte bukaerako ekitaldian egiten dituztenak; Oiartzunen Txerri Egunean, Intxixuen etorreran, Inude eta Artzainen festan, Euskararen Egunean edo Euskal Jaian izaten dira. Udalaren laguntzaz Soinu Zahar eta Aurresku txapelketak ere antolatzen ditu. Eta herriaren izena hauspotzen dute ere deitzen dituzten Dantzari Txiki Egun guztietan.