Oiartzun ibaiak ez du arazorik sortu, momentuz, Errenteria-Oreretan

Oiartzun ibaiak ez du momentuz arazorik sortu, baina hainbat adar erori dira herriko puntu ezberdinetan, eta putzu batean harrapatuta gelditu dira hiru auto Pontikan.

Ikerne Zarate Gartziarena

Errenteria-Orereta

2018/06/12

Metro eta eridan dago Oiartzun ibaia eta ez du momentuz arazorik sortu.

Ibaien egoera eta iragarpen meteorologikoa kontuan hartuta, Segurtasun Sailak Uholdeen Larrialdi Plan Bereziaren Alerta fasea deklaratu du Oiartzun ibaiaren arroan. Gauean euri asko egin du, goizean zehar ere erruz ari du. Eta datozen orduetarako ere euria iragarrita dago. Adi dago Udaltzaingoa, baina eguerdira arte behintzat, ez du arazorik sortu Oiartzun Ibaiak Errenteria-Oreretan. Udaltzaingoak jakinarazi duenez, metro eta erdian dago ibaia. Itsasgora 14:30ean izango da eta horri begira dira orain. Ibaiak ez du arazorik sortu, baina bai haizeak eta euriak. Etengabe ari du gauaz geroztik, eta besteak beste, putzu handi batean harrapatuta gelditu diren hiru auto atera behar izan dituzte goizean Pontikako Joxe Miguel Barandiaran plazatik. Beste bost gertakari ere izan dira goizean zehar. Agustinak auzoko etxe batean leihoa apurtu du haizeak eta auto baten gainera erori da. Gabierrota auzoan berriz, Salk eta Sabin kalean bide seinalea bota du haizeak eta auto bat jo du azken horrek. Lartzabal eta Gabierrota artean, bestalde, zuhaitz adar bat erori da errepidera haizeak apurtuta eta ordu erdiz izan da moztuta bidea suhiltzaileek adarra errepidetik kendu duten arte. Beste bi adar ere eroria dira haizearen ondorioz, bi horiek Beraun auzoan, bidegorrian bata, eta Beraun kalean, bestea. Udaltzaingoak jakinarazi duenez, alerta egoera ezarrita, maiz begiratzen ari dira Oiartzun ibaiaren emaria.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.