Harrera herria izango da Errenteria, baina ez soilik Aquarius itsasontziko krisiaren aurrean, baita etorkizunean babes beharra duten eta miseria zein gudutik ihesi datozen pertsona errefuxiatuentzat.
Aquarius ontziarekin gertatutakoak hautsak harrotu ditu berriz ere.
Harrera herria da Errenteria-Orereta. Hala jakinarazi du, bihar izango den Errefuxiatuen Nazioarteko Egunari begira gaur zabaldu duen adierazpen instituzionalean. Harrera herria izango da Errenteria, baina ez soilik Aquarius itsasontziko krisiaren aurrean, baita etorkizunean babes beharra duten eta miseria zein gudutik ihesi datozen pertsona errefuxiatuentzat.
Aquarius itsasontziaren krisiak zer pentsatu ugari eman du azken egunetan, eta tanta bat gehiago izan da errefuxiatuekin Europak0 Batasunak erakutsi duen jarrera desegokiaren ontzian.
Adierazpen instituzionalean, ihesi doazen pertsonak babestea instituzio publikoen betebeharra dela diola indarrean dagoen legediak gogorarazi du udalak. Europako Batasunari politika neoliberala eta “austeritarioa” izatea leporatu dio, “gasolina bezala jokatu dute eta pobreen arteko gatazka sustatu, diskurtso eta ideologia xenofobo eta arrazistei bidea zabalduz Europako gizartean”.
Batasunaren sorreraren helburuetako bat elkarbizitza baketsua sustatzea eta zabaltzea izan zela Europako nazioen artean gogorarazi du bestalde, “1930eko hamarkadan faxismoaren eta eskuin muturreko munstroen gorakadak eragindako sarraskiak berriz ere errepika ez zitezen”. Eskuin muturrak gaur egun ere gorakada bizi du udalaren ustetan, ezberdinarekiko gorroto diskurtsoak zabaltzen ari direla salatu du eta horren adibideak ere jarri ditu: “Hungarian Jobbik, Frantzian Fronte Nazionala, Italian Lega Nord eta Movimiento 5 Stelle, Erresuma Batuan UKIP, Alemanian AFD, Austrian FPO… iraganeko munstroak oso era arriskutsuan gogorazten dizkigute”.
Gogor salatu du Italiako gobernuaren azken erabakia: “Lega Nordeko eskuin muturrekoalderdi xenofoboaren zuzendaritza politikoaren menpean, miseria eta gudutik ihesian doazen 629 pertsona jitoan utzi ditu. Europako Batasunaren tendentziak, historian parerik ez duen giza migrazio eta munduko errefuxiatuen gorakada sistematikoari erantzuna eman beharko dion partekatutako gogoeta prozesu bat abian jartzeko beharra erakusten digu”. Argi dio giza desplazamenduetan Europak oinarrizko papera duela, baita erantzukizun “ekidinezina” ere.
Italia eta Maltaren jarrera arbuiatu du, eta haien jarrera bezain gaitzesgarria dela Europako Batasuneko beste herrialdeen “isiltasun konplizea” erantsi du, “zerbait esatekotan, mugen kontrola areagotzeaz baino ez dute hitz egiten”.
Horrenbestez, babes eta harrera politikak aldatzea migrazio arloan eskatu dio Errenteriako Udalak Europako Batasunari fluxu migratorioen erronkari aurre egiteko, eta mahai gainean jar ditzala egite edo ez egiteagatik Aquarius itsasontziaren harreraren gainean izan diren legedi hauste eta giza eskubide urraketak. Espainiako estatuko gobernuari estatuaren mugetan dabiltzan pretsona migrante eta errefuxiatuen harrera bermatzea galdegin dio. Aquarius ontzian heldutakoen kasuan bermatzea, kalitatezko baldintzetan hartuko dituztela, pertsonen duintasuna, beraien borondatea eta indarrean dagoen legedia errespetatuta. Eusko Jaurlaritzari eskaera bera egin dio Gipuzkoa, Bizkai eta Arabara heltzen diren pertsona migrante eta errefuxiatuen harrera bermatzea duintasun, kalitate eta eskubideak bermatuta, existitzen diren babes sistemak erabilita neurri zehatzak inplementatuta pertsonen beharretara egokitutako harrera integralean aurrera pausuak emanez.
Kalitatezko arreta bermatzeko galdegin dio, halaber, Gipuzkoako Foru Aldundiari, eta gizarte babeseko neurri espezializatuen aplikazio zehatzetan migrante eta errefuxiatuen behar espezifikoak kontuan hartzea.
Euskal instituzioek hasitako lan koordinatua eta solidarioak jarraipena izan dezan eskatu du udalak bestalde, eta bere burua harrera udalerri bezala eskaini du. Azkenik, sentsibilizazio kanpainak aktiboki martxan jartzea eskatu du, “gorroto diskurtso xenofobo eta arrazisten aurka, horiek borrokatuz errepika ez daitezen bermatzeko”.
