Madalenetako herri bazkarirako txartelak salgai bihartik

Bazkarirako zapi txartelak bihar jarriko dituzte salgai , 15 euroan helduentzat eta 10 euroan haurrentzat, eta menu beganoa ere eskainiko dute.

Ikerne Zarate Gartziarena

Errenteria-Orereta

2018/06/19

Jai batzordeak antolatutako herri bazkarian hamarnaka lagun bildu ziren iaz.

Jai Batzordeko kideak ilusioz ari dira madalenetako egitaraua prestatzen auzolanean, herritik eta herriarentzat, eta azken urteetan bezala, elkarlanaren lehen topagunea herri bazkaria izango da. Hilaren 21ean izango da Herriko plazan eta herritar guztiak deitu dituzte parte hartzera. Bazkarirako zapi txartelak bihar jarriko dituzte salgai , 15 euroan helduentzat eta 10 euroan haurrentzat, eta menu beganoa ere eskainiko dute. Azken hori, 15 euroan. Janaria bultzatzeko berriz, ardoa, sagardoa txotxean eta Añarbeko ura izango dira. Txartelak erosteko aukera uztailaren 8ra arte izango da. Helduen menurako txartelak, Reyna, Xera Gastroteka, eta Aralar tabernan izango dira salgai; haurren menurako txartelak, Xenpelar Kulturdendan; eta Menu beganorako txartelak, Sindikato tabernan. Bazkariaren txartelaren prezioaren barruan, zapia jasoko dute opari parte hartzaileek. Menuak ere zehaztu ditu jai batzordeak irrika bizian jartzeko. helduentzat entsalada mistoa, langostinoak, txerri saiheskia parrilan eta limoi sorbetea; haurrei begira berriz, kroketak, patea, hanburgesak parrilan patatekin eta izozkia prestatuko dute; menu beganoa hautatzen dutenek, barazki pastela, ziazerba kroketak, lasagna begetala eta limoizko sorbetea izango dute otordurako.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.