Atlantikaldiaren bosgarren aldia aurkeztu dute gaur. Jaialdia erabat errotuta, kalitate goreneko musika eskaintzarekin dator aurtengoa ere, kultur aniztasunari helduta, baita sorkuntzari ere.
Collar, Mendoza eta Landa Atlantikaldiaren aurkezpenean.
Atlantikaldia Kultur Topagune eta Musika Jaialdiaren bosgarren aldiaren kartelburuen izenak jakinarazi dituzte gaur Julen Mendoza alkateak, Ion Collar Kultura zinegotziak eta Laura Landa jaialdiaren zuzendariak. Bebe, Nneka, Esne Beltza eta 47 Soul taldeak arituko dira irailaren 20tik 23ra Agirre Lehendakariaren plazako agertoki nagusian.
Gaur egin dute Atlantikaldiaren aurtengo ekinaldiaren lehen aurkezpena, eta kartelburuek jaialdiak kalitatearen aldeko apustua egiten jarraitzen duela nabarmen utzi dute.
Itsas korronteak da aurtengo goiburua, eta bosgarren aldia berritasunekin heldu da.
Kartel berria izango du, itsas korronteen ondorio dela esan du Mendozak, “Daniela Garreton artista txiletarra da, Atlantikoaren bestaldetik datorrena, baina une honetan Donostian bizi dena”. Kultur topagune eta musika jaialdia dela Atlantikaldia, baina sorkuntzarako eremua ere badela nabarmendu du, “sorkuntza bultzatzea bilatzen du, artista ezberdinen topaleku da eta artista horien artean gauza berriak sortzea ere bultzatzen du. Kultur ezberdinen topaleku izatetik harago sorkuntza espresio ezberdinen batuketa izatea du helburu, mestizajea bilatzen du. Mestizaje horrek, badu zerikusia Atlantikoaren beste aldean dauden kultura horiekin guztiekin, baita Atlantikoa gurutzatu gabe, hemen bertan ditugun kultura guzti horiekin ere”.
Errenteria herri anitza dela erantsi du Mendozak eta horren adierazle, udalerrian dauden 80 kultur komunitateak aipatu ditu, “komunitate horiek barnebiltzen dituen jaialdia ere bada Atlantikaldia”.
Atlantikaldiak Errenteria-Oreretaren izaerarekin bat datozen balioak barne hartzen dituela nabarmendu du bestalde, Collarrek: “parte hartzea, herritarrek eta herritarrentzat egindako jaialdia da, eta elkarbizitza baita hizkuntza eta kulturen artekoa ere, errazten duen topagunea da. Elkarrizketa eta elkarlana sustatzen du jaialdiak”.
Herritarrei egin die aipamena, eta azken horiek ematen diotela nortasuna jaialdiari nabarmendu du, “parte hartzea ezinbestekoa da, beraiek sortzen baitute kultur programaren funtsa”. Horren erakuslea da jaialdirako Errenteriako Udalak jaso duen proposamen zaparrada. Horretan ari dira oraintxe, programa osatzen, 70 ekintza izango dituen kalitatezko egitarau zabal eta aberatsa egi bihurtzeko. Horren harira, eskerrak eman dizkie eragile guztiei egindako proposamenengatik. Tartean, musika emanaldiak, erakustaldiak, dantza ikuskizunak, gastronomia ardatz duten jarduerak, kirola, tailerrak, eta kaleko artearekin lotutakoak daude.
Pozik azaldu da Landa aurreko urteetan bezala, musika programazioa “mimo handiz” landu dutelako aurten ere, eta kalitatezko eskaintza anitza izango delako jaialdiaren barruan. Irailaren 21ean,
47 Soul Palestinako taldea arituko da . Beraien tradizioetan oinarritutako musika fusionatua entzuteko aukera izango da. Egun berean
Esne Beltza arituko da Agirre Lehendakaria plazako agertokian.
Irailaren 22an, larunbata, bi emakume indartsu izango dira agertoki nagusiko oholtza gainean,
Nneka eta
Bebe. Horiekin batera musika egonaldiak antolatuko ditu aurten ere Atlantikaldiak, bertako eta kanpoko abeslariekin, eta bat nabarmendu du Landak, Manez eta Kobreak eta Sertanilia taldeen egonaldi artistikoaren uzta oholtza nagusira eramango dute irailaren 20an, ostegunarekin.
Manez eta kobreak talde berria da, eta Kalakan taldeko Thierry Biscary kide ohia da gidaria. Musika tradizionala soinu berritzaileekin eta doinu gogoraerrazen bizitasunarekin nahasten ditu taldeak.
Sertanilia Brasildik dator, eta 2010 urtean sortu zuten taldeak Sertao badiako kultura anitzetan inspiratutako musika unibertsala eskaintzen du. Tradizioa berreskuratuta, Portugal, eta Galizia iparraldeko landa eremuetako trobalarien musikara hurbilketa da bere musika.
Bi taldeen egonaldiak, kontzertu bakarra entzuteko aukera emango du, berariaz, Atlantikaldirako sortutako emanaldia.
Kartel buruak honakoak, baina ez dira Atlantikaldian arituko diren bakarrak, datozen asteetan egitaraua osatuko duten musika emanaldien berri ematen jarraituko du udalak.
Atzerako kontaketa hasi du Atlantikaldiaren bosgarren aldiak.
