[Bideoa] 'Irria Harro!', haurren uzta ederra

2018/06/20

Herriko plazan grabatu zuten bideoklipa. Argazkia: OarsoIrriak

Txupinazo Txikia kantuz jantzi nahi zuten, eta horri begira jo eta su aritu dira lanean Haurren Jai Batzordea, OarsoIrriak Iniziatiba, eta proiektuaren protagonista izan diren Errenteria-Oreretako haurrak. Martxotik aurrera hainbat dinamika parte hartzaile egin ditu OarsoIrriaken dinamizazio taldeak, eta kantuaren sorkuntza prozesua hasi zuten. Hiru hilabete pasata, badute abestia, ederra, euskara, auzolana, eta parte hartzea oinarri izan dituen prozesuaren ostean. Aurtengo madalenetan, beraz, txupinazo txikiak abesti propioa izango du. Eskerrak eman dizkie OarsoIrriak iniziatibak parte hartu duten familiei eta nabarmendu du bereziki haurrentzat zirraragarria izan dela gogoeta eta ekintza prozesua: “Jaietako emozioez hausnartu, emozio horiei hitzak jarri, hitzak musikaz lagundu, eta azkenik, hitzei eta musikari bideoklipa gehituta. Orain arte haurrak izan dira protagonista eta aurrerantzean ere hala izaten jarraituko dutela gaineratu dute herriko jaietan, “madalenetan Irria Harro abestia ahotan hartuta, alaitasuna, freskotasuna eta indarra transmitituko digute kanta berriaren bidez”. Horren harira, uztailaren 21ean Koldo Mitxelena plazan Txupinazo Txikira bildu eta kantaren estreinaldiarekin bat egitera deitu ditu familiak, haur eta gurasoak OarsoIrriak iniziatibak. han lehen aldiz izango dute aukera haur eta gurasoek kanta berria festa giroan abestu eta gozatzeko.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.