Bi tailer izango dira, 15:00etan merkatarientzako berezi bat, eta 18:00etan publiko orokorrarentzat.
Ingurumen diputatu Jose Ignacio Asensio, Pasaiako alkate Izaskun Gomezekin, Argitu programaren tailerren aurkezpenean.
Gipuzkoa Argitu programaren barruko tailerrak Pasaiara heldu dira. Ostiralean (hilak 22) izango dira pasaitarrentzat tailerrak, Trintxerpeko alkateordetzan. 15:00etan izango da lehena, merkatariei zuzenduta, eta 18:00etan bigarrena, publiko orokorrarentzat. Sarrera debalde da, lekua bete artean, eta jendea kanpoan geratuko balitz, tailer gehiago antolatuko dituztela agindu dute.
Helburu didaktikoa dute antolatu dituzte tailerrek, gaur goizean Pasaiako Udalean Ingurumen diputatua Jose Ignacio Asensiok azaldu duenez. Izaskun Gomez alkatea izan du ondoan tailerren aurkezpenean, eta biek azaldu dutenez “informazio pauta batzuk herritarrei erraztuz energia kontsumoa ahalik eta gehien murriztea” lortu nahi dute. Horregatik, tailerra joateko asmoa dutenei beren fakturak eramateko aholkatu diete. Beren kontsumoari buruzko informazio nola lortu, kontratatutako potentzia egokia den, tarifen gaineko informazioa… horiek eta beste hainbat argituzko diete tailerrean.
Erakundeak eredugarri
Asensiok eta Gomezek adierazi dutenez “energiaren kontsumo arduratsua bultzatzeko orduan erakundeen papera eredugarria izan behar du”, eta horregatik Gomezek Pasaiako Udalak esparru horretan egindakoen berri eman du.
Pasaiako alkateak jakinarazi duenez, iaz, Oarsoaldearekin elkarlanean, udal eraikinen eta argiteriaren gaineko diagnostiko bat egin zuten, gas, elektrizitate eta gasolio kontsumoak aztertzeko eta aurten egitekoen planifikazioa zehazten ari direla gaineratu du. Erabaki batzuk hartu dituztela jada eta horiek indarrean jarrita 46.000 euro aurreztea lortu dutela nabarmendu du alkateak, kontsumoa %12 murriztuz udal eraikinetan, eta %9 kaleko argiterian. Hurrengo urratsa udal eraikin bakoitzaren azterketa zehatzago bat egitea izango dela iragarri du alkateak.
Asensiok, bere aldetik, Gipuzkoak duen menpekotasun energetikoari erreparatu dio, %96koa dela azpimarratuz, eta zentzu horretan, Gipuzkoa Argitu programaren helburua ez dela soilik ekonomikoa aipatu du. Kontsumoa ahalik eta gehien murriztu nahi dute, ingurumenarekiko kezkaz, eta negutegi efektua gutxitu nahian.
Gipuzkoa Argitu programaren webgunean tailerretan landuko diren
tutorialak ikus daitezke.
