Gazteei alokairua ordaintzeko laguntza emango die udalak

Neurriarekin, 18 eta 30 urte arteko gazteen autonomia eta emantzipazioa sustatu nahi duela azaldu du udalak.

2018/06/26

Alokairua ordaintzeko laguntza emango die gazteei udalak.

Gazteei alokairuaren ordaintzeko diru laguntzak emango dizkie udalak. Neurriarekin, 18 eta 30 urte arteko gazteen autonomia eta emantzipazioa sustatu nahi duela azaldu du udalak. Diruz lagunduko diren alokairu gastuak aurtengo urtarriletik abendura bitartekoak izango dira, eta diruz lagundu daitezkeen kontzeptutik kanpo gelditzen dira garaje eta komunitate zein administrazio gastuak, baita kontribuzio edo zerga kontzeptupean sor daitezkeenak ere. Laguntza urtebeterako eskaintzen da, eta gehienez, 250 eurokoa izango da hileko. Diru laguntza jasotzeko 18 eta 30 urte artekoak izan behar dute eskatzaileek, eta diru laguntza jasoko duen etxebizitzan erroldatuta egon behar dute. Onuraduraren eta errentatzailearen artean ezin izango da inolako familia loturarik izan, eta eskatzaileak, halaber, ezin du bere jabetzan etxebizitzarik izan. Amaitzeko, diru iturri erregularra izatea eskatzen du udalak, 28.000 eurokoa gehienez, eta bizikidetza unitatea pertsona batek baino gehiagok osatzen duten kasuan 39.000 eurokoa gehienez. Diru laguntzaren zenbatekoa, eskatzaileen diru sarreren arabera ezarritako atal sistema batean oinarritzen dela azaldu du udalak, atal bakoitzari portzentai bat esleituz. Bizikidetza unitatea pertsona bakarrak osatzen duenean, 19.000 euro arteko diru sarrerak dituztenek 250 euro jasoko dituzte; 19.000,01 eta 21.000 euro artean, 200 euroko laguntza: 21.000,01 eta 23.0000 artean, 150 euroko laguntza; eta 23.000,01 eta 25.000 artean, 100 euroko laguntza. Bizikidetza unitatea pertsona batek baino gehiagok osatzen duenean, berriz, 26.000 euro arteko diru sarrerak dituztenek, 250 euro jasoko dituzte; 26.000,01 eta 30.000 artean, 200 euroko diru laguntza; 30.000,01 eta 33.000 euro artean, 150 euroko diru laguntza; eta 33.000,01 eta 39.000 euro artean, 100 euroko laguntza.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.