Mozioa aztertu zuen atzo plenoak, eta hura aho batez babestuta, konpromisoa hartu du bere politiketan sexu aniztasuneko eta genero identitateko ikuspegia sartzeko.
Aho batez onartu du mozioa udalak.
LGTBI+ kolektiboaren Sexu Askapenerako Nazioarteko Egunarekin bat egin du udalak ordezkaritza duten alderdi politiko guztien babesarekin. Mozioa aztertu zuen atzo plenoak, eta hura aho batez babestuta, konpromisoa hartu du bere politiketan sexu aniztasuneko eta genero identitateko ikuspegia sartzeko. Ez da hartu duten erabaki bakarra, diskriminazioaren prebentziorako eta identitate eta praktika sexu afektibo ez heteroarautzaileak, askotarikoak eta askatasunean egindakoak garatzeko ekintzak barneratzen dituzten hezkuntza feministako programak sustatuko ditu udalak.
Beharrezko baliabide guztiak emango dizkie udalak gainera, diskriminazioa jasaten duten LGTBI+ pertsona guztiei, eta bereziki beren sexu, arraza, jatorri, egoera administratibo eta beste arrazoiengatik kalteberatasun handiagoko egoeran dauden pertsonei sozialki, psikologikoki, juridikoki, eta ekonomikoki laguntzeko.
Araudi espezifikoa martxan jartzea ere eskatu du udalak mozioaren bidez Araba, Bizkai, eta Gipuzkoan LGTBI+ pertsonen eskubideen defentsa osoa eta araudiaren garapen egokirako beharrezko baliabide guztiak bermatuko dituena. Aldi berean, LGTBI+ adineko pertsonen arreta egokirako zerbitzuak sustatuko ditu udalak, eta arreta osoa eskainiko die, halaber, beste leku batzuetatik iristen diren eta beren sexu orientazioaren edo genero identitatearen ondorioz jazarpena jasaten dutela adierazten duten pertsona guztiei.
LGTBI+ eta feministekin etengabeko komunikazioa eta lankidetza kanalak mantentzea adostu du, bestalde, udalak eta iniziatiba bateratuak martxan jartzeko baliabideak erraztea, besteak beste, LGTBI+ komunitatearen errealitatea ezagutzeko diagnostikoak sustatzea, beraiekin kontrastatuta.
LGTBI+ pertsonek jasaten dituzten erasoak, edozein eratakoak direla ere arbuiatu ditu udalak, eta horiei aurre egiteko informqzioa eta sentsibilizazioa baliatuko du herritarrekin zein udal langileekin. Amaitzeko, herritar guztiak deitu ditu udalak LGTBI+ eta feministek Errenteria-Oreretan deitzen dituzten ekintzetan parte har dezaten.
