Udalak 'La Manada'ren behin behineko askatasuna gaitzetsi du aho batez
Premiazko mozio bat adostu dute talde politiko guztiek, Iruñeko bortxaketaren egileen askatasuna deitoratzeko.
Ez zegoen gai zerrendan, baina premiaz txertatzea adostu zuten talde politiko denek, “gaiak jendartean eragin duen haserrea eta kezkak” bultzatuta.
Pasaiako plenoak aho batez onartu du hilabeteko ohiko plenoan ‘La Manada’ izenez ezagunak behin behinean aske uzteko erabakia gaitzestea. “Larria” deritzote erabakiari udalean, eta hortik “gaiari buruz jarrera argia eta azkarra plazaratzeko” iniziatiba.
Iruñeko iazko sanferminetan jazotakoa bortxaketa izan zela argi dute udalean talde politiko guztiek, eta horregatik maitasuna eta elkartasuna adierazi diote biktimari eta haren senitarteko eta ingurukoei.
Horrez gain, “erabateko desadostasuna” agertu dute autoan jasotakoekin, eta autoa inpugnatzeko asmoa dutenei babesa erakutsi diete. Autoarekin “etsita eta haserre” agertu da udala, “erabakiak emakume guztiak babesik gabe” uzten dituela argudiatuta . “Sistemak ez ditu behar bezala babesten emakumeen bizitzak eta ez ditu emakumeen eskubideak bermatzen. Hau ez da justizia”, dio mozioak hirugarren puntuan.
Bide beretik, emakume guztiek askatasunerako duten eskubidea aldarrikatu eta Pasaiako Udalak ez duela inolako eraso matxistarik onartzen ohartarazi dute, eta horregatik, mobilizazioekin bat egin eta horietan parte hartzera deitu dute.
Azkenik, udalak berdintasunaren alde lanean jarraitzeko konpromisoa berretsi du, “emakumeen eskubideen defentsan eta patriarkatuaren adierazpen ororen aurka”.
Francoren ohorezko alkate izendapena, bertan behera
Bestela, sorpresa handirik gabeko plenoa izan zen atzokoa. Aho batez onartu zuten bestea, Francisco Francoren ohorezko alkate izendapena bertan behera uzteko diktamena.
Pasaiak Ahal Du-ren ikerketa baten harira jakin da, orain gutxi, izendapena bazela eta indarrean jarraitzen zuela, eta aurreko pleno batean gaia denok batera lantzea erabaki zen. Atzo eraman zuten gaia plenora, aurrez adostuta, eta beraz, denen babesaz atera zen aurrera.
Nabarmentzekoak, baita ere, plenoa amaitzear zela Izaskun Gomezek aipatutako hitzak. “Poza handia” agertu zuen alkateak Amaia Agirregabiria 3. graduan Martuteneko kartzelatik irten delako. “Inoiz gertatu behar ez zen amets gaizto honen ondotik, bere bizitzari normaltasunez berrekiteko aukera izatea espero dut”, adierazi zuen Gomezek, eta gaineratu “pleno honetan nire aipamena merezi duela uste dut”.
