Alderdi sozialistaren hilabete hauetako kudeaketaz mintzatu dira, eta gobernu taldeari "kudeaketa falta" egotzi diote.
PSE-EEko Rodriguez eta Palencia gaurko agerraldian.
Agintaldiaren azken sei hilabetetako balantzea egin dute gaur Jose Angel Rodriguez, alderdi sozialistaren Errenteriako idazkari orokorrak, eta Isaac Palencia zinegotziak. Alderdi sozialistaren hilabete hauetako kudeaketaz mintzatu da lehenik Rodriguez eta Errenteria zein herritarren bizitza hobetze aldera hainbat proposamen egiten ari direla esan du: “Erakunde ezberdinetan ari diren alderdi sozialistako ordezkariei esker gure herria hobetuko duten proiektuetarako inbertsioak egingo dira”.
Tokiko kudeaketa egiteaz gain, beste erakundeekin elkarlanean ari direla azaldu du Palenciak, “batez ere Eusko Jaurlaritzako edo foru aldundiko hainbat sailetan ari diren kide sozialistekin Errenterian egiten duten inbertsio publikoa babesten”. Horren harira, azken urtean egin diren inbertsiorik garrantzitsuenak nabarmendu ditu, eta besteak beste, aldundiko Kultura, Gazteria eta kirol sailaren 2.500.000 euroko inbertsioa aipatu du, “Lekuonaren proiektuak hartuko du zatirik handiena, 2.136.000 euro. Proiektu hau soilik guk defendatzen genuen, eta gaur egun alderdi guztiek babesten dute. Mugikortasun sailetik, berriz, herrian egin diren proiektu ugariren %80 finantzatu dute. Aurten, 839.000 euro inbertitu dira, eta proiekturik nagusienak Beraungo igogailuak, auzo bereko kultura etxea eta Alabergako bidegorria izan dira”.
Laguntza horiei esker bestelako proiektuak ere egin direla erantsi du Palenciak, “agintaldi honetan Alabergako igogailuak, Alfontso XI kalea oinezkoentzat egitea, edo Torrekuaren egokitzapena. Ingurumen sailak ere egin du ekarpena, Iztietako kolektorea eta ponpaketa estazioa konpontzeko Añarbarekin elkarlanean. 2.200.000 euroko inbertsioa egin du horretarako aldundiak”.
Eusko Jaurlaritzaren Etxebizitza sailaren ekarpenari ere egin dio aipamena Palenciak, “Arramendin gazteentzako 51 etxebizitza dotazional egiten ari da eta 5.300.000 euroko inbertsioa egingo du horretarako”.
Errenteriak hainbat arazoa dituela esan du bestalde, Rodriguezek, eta horiek “areagotzea” leporatu dio gobernu taldeari. Azken horri “kudeaketa falta” leporatu dio: “Arazo gehien sortzen duen gaia aparkamendua eta trafikoa da, ez zaio irtenbidea eman gaiari, kontrakoa, aparkaleku plazak murriztu egin ditu gobernu taldeak, eta auzoak gainezka daude. Bi agintaldi kudeatu ondoren, hegoaldeko ingurabidea ez dute egin, eta Pontika edo Olibeteko aparkalekuak ere ez ditu egin, nahiz eta horretarako konpromisoa hartu zuen”.
TAO zerbitzuaren publifikazioari ere egin dio tartea Rodriguezek: “Garesti atera dakioke udalari auzitegiak lehen instantzian emandako ebazpenak berresten baditu. 600.000 euro baino gehiago ordaindu beharko du eta 12 langile kalean utziko ditu”.
Errenteriaren garbitasuna eta erakargarritasuna kolokan jarri du, gainera, “kale, parke eta fatxaden garbitasun eza nabarmena da, nahiz eta gure alderdiak askotan salatu duen hori. Hiri mantenuarekin beste hainbeste gertatzen da, apurtutako mobiliarioa ez delako aldatzen, puntu ilunak ez direlako ezabatzen, edo bide seinaleak ez direlako margotzen”.
Etxebizitza eskaerak gora egin duela esan du, bestalde: “Une honetan 2.000 eskaera daude eta horietatik 1.500 alokairu sozialaren eskatzaile dira Alokabidek emandako datuen arabera. Datua ikusita, alkateari eskatu diogu Eusko Jaurlaritzarekin eta promozio pribatuekin elkarlanean aritzeko eskaera horri erantzun ahal izateko. EH Bildu eta Errenteria Irabazizen etxebizitza politika nulua da”.
Gizarte zerbitzuen kudeaketaz ere aritu da, eta Gizarte Zerbitzuetako zinegotziari konpromisoak ez betetzea egotzi dio: “Larrialdi laguntzak murrizten saiatu da, eta gure alderdiaren kritikei esker ez zuen halakorik egin”. Gazteen Informazio Bulegoa “itzaltzen” uztea ere leporatu dio Gobernu taldeari Rodriguezek.
Ezberdinen arteko elkarbizitza sustatzeko beste alderdiekin elkarlanean aritu direla esan du, azkenik, Rodriguezek. Elkarlanerako prest azaldu da, “errespetutik, parte hartzetik, eta gardentasunez egiten duten alderdiekin. Alkatetzan izan ginen bitartean Errenteria irauli genuen eta berriz ere egin dezakegu, egiten dakigulako eta horretarako prest gaudelako”.
Gaurko agerraldian egin duen balantzea aldizkari batean bildu du alderdi sozialistak, eta Rodriguezek azaldu duenez, 18.000 ale banatuko dira datozen egunetan.
