Antxoko sanferminen atariko asteburuan, pala eta krosa

Pala txapelketako finalak larunbatean jokatuko dira, gizonena eta emakumeena. Lore Txorta elkartearen krosa igandean da, 11:00etan hasita.

Urko Etxebeste

Pasaia

2018/06/28

Iazko Antxoko San Fermin krosaren irteera.

Hurbiltzen ari dira Antxoko sanferminak, uztailaren 4tik 8ra dira. Pasaiako beste barrutietan ere ari dira jai giroan, esaterako San Pedron. Antxon, ordea, jaiei harrera egiteko kirola izango dute menu nagusi: etzi (larunbata) Axular kafetegiak antolatzen duen pala txapelketako finalak jokatuko dira (3. eta 4. postuetarako lehiak bihar dira), eta igandean San Fermin Jaietako Krosa izango da, Lore Txorta elkartearen eskutik. Pala lehiak bukatzear dira. Astearte eta asteazken artean jokatu dira finalerdiak. Emakumeetan finalera iritsi diren bikoteak Susi-Laura eta Ane-Nerea izan dira; larunbateko 11:00etan jokatuko da final hori, Ibaiondo pilotalekuan. 3. eta 4. postuetarako lehia bihar (ostirala) arratsaldean da, eta Edurne-Ana eta Maitane-Nora bikoteek jokatuko dute. Gizonetan, berriz, finala larunbateko 12:00etan hasiko da. Bertara iritsi diren bikoteak Mikel-Aitor eta Alberdi-Arru dira; ostiraleko 3. eta 4. postuetarako partidan Javi-Iñaki eta Iribar-Yanci bikoteak izango dira. Larunbateko finalak jokatu ondoren, bazkaria egingo dute partaideek Axular plazan. Krosa Lore Txorta elkartearen sanferminetako krosa Antxoko jaien atariko klasikoa da, eta aldi berean, Gipuzkoako krosen zirkuituko zaharrenetakoa. Igandean da, 11:00etan hasita. 7 kilometroko ibilbidea izango du, barrutiari hainbat bira emanez. Irteera eta helmuga Zumalakarregi kalean izango dira, Lore Txorta elkartearen parean. Maila bakoitzeko lehenek saria jasoko dute, baita maila bakoitzean hoberen ibiliko diren herriko korrikalariek ere. Aldez aurretiko izen ematea zabalik dago, Herrikrosa plataformaren webgunean, 7 euroan. Ostiral gauerdira arte eman daiteke aldez aurretik izena. Egunean bertan, igandean, badago izena emateko aukera proba hasi aurretik baino 30 minutu lehenagora arte (10:30ak arte). Kasu horretan, 10 euro ordaindu beharko dituzte partaideek. Proba nagusiko datuak dira aurrekoak, 16 urtetik gorakoena. Haur eta gazteentzako lasterketak ere badaude. Sari banaketa lasterketa bukatzerakoan egingo da, Gure Zumardia plazako oholtzan.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.