Gaia lantzeko foro egokirik ezean, herritarrek helarazitako kexei tartea eman nahi die Lezon Ondo ai Ginenek, eta prentsaren bidez publiko egitea erabaki du.
Kontrolik ezdagoela salatu du Lezon Ondo Ai Ginen taldeak. Argazkia: Lezon Ondo Ai Ginen
Lezon Ondo Ai Ginen taldeak hiru alditan eskatu du dagoeneko Jesus Maria Martiarena alkatetzara heldu zenetik Hondakinen Mahaia osatzeko. Udal gobernua, teknikoak eta herritarrok osatuko lukete mahai hori. beste askotan proposamen zehatzak egin dituela taldeak hondakinen bilketaren eta birziklatzearen inguruan gaineratu du taldeak. Eskaera horiek guztiak modu ofizialean egin dituela, udal erregistroaren bidez, nabarmenduta, udalak idatziz bitan ukatu diela mahaia osatzea azaldu dute.
Gaia lantzeko foro egokirik ezean, herritarrek helarazitako kexei tartea eman nahi die Lezon Ondo ai Ginenek, eta horrenbestez prentsaren bidez publiko egitea erabaki dute. Askotariko kexak bildu ditu Lezoko taldeak, horien artean, herrian zehar kontrolik gabeko eta irekiak dauden gero eta edukiontzi gehiago daudela, “horietan gainera, hondakina gutziz nahastuta azaltzen dela, eta gutxienez horrelako sei gune aipatu dizkigute”.
Pertsona heldu ugariren kexak ere jaso ditu taldeak, batez ere Alde Zaharrean bizi direnenak, “sistema berriarekin urrutiago dituztelako edukiontziak. Hondakinak ontzietan sartzeko arazoak dituztela esan digute beste askok, bereziki bakarrik bizi edo arazo fisikoren bat dutenek, eta horren aurrean, lurrean uztea erabakitzen dutela askotan”.
Saltoki eta tabernetatik ere jaso dituzte kexak, “sistema berriarekin, organikoa izan ezik, beste hondakinak kantitate handian garraiatu behar dituztelako edukiontzietara , eta gainera, horietan sartzeko benetako arazoak dituztelako”. Aurreko sistemarekin hondakin guztiak sailkatuta biltzen zirela komertzio guztietan gogorarazi du Lezon Ondo Ai Ginen taldeak.
Edukiontziak zikinak eta usainarekin daudela, txipa duten edukiontzietan pilak amaitu egiten direla eta askotan hondakina lurrean utzi behar izaten dutela, edota San Markos Mankomunitateko kamioek hondakinak lurrera bota eta ez jasotzearen gaineko kexak ere jaso ditu taldeak. Landa eremuko bizlagunak ere kexu dira, “Lehen hondakina etxe aurrean biltzen zitzaien, eta gaur egun dezente mugitu behar dute. Gainera, landa eremuko edukiontziak oso zikin eta nahastutako hondakin ugari izaten dute, Errekalde eta Goiko bailaran adibidez”.
