Bihotzen bila aterako dira
Errenteria-Oreretako Sarek larri gaixo dauden Aitzol Gogorza eta Mikel Arrieta presoen alde norbanakoen indarra bildu nahi du. Auzoetan lanketa berezia egin du horretarako.
Iniziatiba aurkezteko Sare Herritarrak joan den larunbatean egin zuen agerraldia.
‘Izan taupada’, lelo izatetik ekiteko filosofia bihurtzera
Izan taupada, lelo bat baino askoz gehiago da Errenteria-Oreretako Sareko kideentzat. Filosofia bat dela diote, eta norbanako bezala filosofia hori barneratzea garrantzitsutzat ematen dute. Txarli Garciaren esanetan, «mundu guztia dago ados guk aldarrikatzen dugunarekin, hau da, presoek ez dutela askatasunik, baina bai eskubideak. Jendea hortaz konturatzen da. Baina oraindik falta zaiguna da jauzi txiki bat ematea. ‘Hau nire arazoa da ere’ esatea jende guztiak. Arazoa jende askok ez du ikusten konpondu behar den erronka bezala». Adostasunetik, konbentzimendura joateko bidea jorratu nahi dute, alegia. Norbanakoen konpromisotik asko izango du bihar Errenteria-Oreretako hiru auzotako plazetan egingo den jarduerak. Batetik, norbanakoek osatutako mobilizazioa izango delako, eta bestetik, partaide bakoitzari ekarpena egiteko eskatu diotelako. Izan ere, Arenalean, Alabergako plazan, eta Pontikako plazan hiruna bihotz zati egin nahi dituzte aurrena —goiko grafikoan ordutegiak—, ondoren zati bakoitza Koldo Mitxelena plazan batu (Esmalterian), bihotz handia osatzeko. Larri gaixo dauden presoen aldeko ikurra da bihotz handia. Bihotz zatiak lehenik eta handia ondoren, norbanakoen, parte hartuko duen herritar bakoitzaren ekarpenarekin osatuko dituzte; izan daiteke argazki bat, oihal zati bat, marrazki bat, mezu bat… Garcia: «Gaixo dauden presoen gaia larria da, gogorra. Edonola ere, baikortasuna, kolorea transmititu nahi dugu larunbateko mobilizazioaren bitartez, itxaropena helarazi nahi dugu. Errealitatea gordina da.?Baina horri itxaropentsu heldu behar diogu». Hiru guneetan musika egongo da, pintxoak ere bai. Era naturalean, baikor, festa giroan bildu nahi dituzte herritarrak. Tokian tokiko plazatik 12:40ak inguruan abiatuko dira hiru zutabeak Esmalteriako plazaraino. Arenaleko zutabea giza eskubideen aldekoa izango da; Alabergakoa konponbidearena; eta Pontikakoa bakearena. Bazkaria Mobilizazioa egin ondoren bazkaria antolatu du Errenteria-Oreretako Sarek Koldo Mitxelenako jolastoki estalian. Otordurako tiketak Sindikato, Landare, Arkaitza, Zuketz, Aralar eta De Cyne Reyna tabernetan eskura daitezke 15 euroan. Haurrentzako menua ere badago.Auzoetara joan da Sare babes eta sinergia bila, eta erantzuna ona izan da
Errenteria-Oreretak 15 auzo ditu. Baina herrian egiten diren ekitaldi gehientsuenak Erdigunean dira. Biharko mobilizaziorako hori eraldatu nahi izan du Sarek, zentroan bai, baina auzoetan ere jarri duelako indarra. Hori egiteko Sarek eman dituen arrazoien artean nagusiena da auzoekin batera gauzak antolatzearena, betiere auzo horien errealitatea errespetatuz. Horrela, Mikel Arrietaren eta Aitzol Gogorzaren egoera sozializatzeko bideak ireki dituzte. «Nabaritu genuen», adierazi du Txarli Garcia Sareko kideak, «gai honen gaineko ezjakintasuna zegoela auzoetako biztanleen artean. Auzoz auzo bilerak egiten hasi ginen horrekin bukatze aldera, jakinda auzoen artean dauden ezberdintasunak». Premisa nagusi bat izan dute harremanak egiterakoan: Sare moldatu da auzoetako izaera, eguneroko eta errealitatera, eta ez alderantziz. Auzo batzuetan kontaktu soiletara mugatu dira. Baina izan dira adibideak harremanetik harago joan direnak, Pontikan izandako esperientzia kasu. «Aitzol eta Mikelen egoera azaltzeko buzoneoa egin zuten auzoan, hitzaldia antolatu zuten… Baldintzak izan diren auzoetan aurrera urratsa egin dugu». Garciak onartu du larunbatean ez dela deus ere bukatuko. Lanketa epe ertain-luzera —«espero dugu ez oso luzera izatea»— egin behar dutela: «Badaude baldintzak gai honekin jende askorengana iristeko. Eta bide horri eutsiko diogu. Auzoetan jaso duguna da guztion giza eskubideen aldeko defentsarekin ados dagoela jendartearen zati handi bat. Hori konpromiso bihurtu behar da».Gaixoak eta 70 urtetik gorakoak, lehen hurbilketak
Pedro Sanchez Espainiako gobernuburuak Diputatuen Kongresuari babesa eskatu dio espetxe politika aldatzeko eta presoak Euskal Herritik gertu dauden espetxeetara hurbiltzen hasteko. Asteazkenean egin zion eskaera Espainiako Kongresuko diputatuei. Gobernuaren asmoa da aurrena gaixo daudenak eta 70 urtetik gora dituztenak hurbiltzea. Hala esan zien Espainiako Kongresuko kazetariei herenegun, elkarrizketa informal batean, berri agentziek zabaldu dutenez. Jaiki Hadi eta Etxerat elkarteen informazioen arabera, gaixotasun larri edota sendaezinak dituzten hamar euskal preso daude Espainiako Estatuko kartzeletan Euskal Herritik kanpo —beste batzuek nahiago izan dute anonimotasuna gorde—, eta hiru presok dute 70 urte edo gehiago. Hau da, Espainiako gobernuaren buruak esandakoa egikaritzen bada, Mikel Arrietak aukera izan dezake Errenteriatik hurbilago dagoen espetxe batean izateko; Algecirasko espetxean dago egun, etxetik 1.100 kilometrora.
