Bihar eta etzi jokatuko dituzte Euskotren Ligako sailkatze kanporaketak. San Juan barruan, Hibaika eta Hondarribia hiru postuetako bat lortzen saiatuko dira.
San Juango bateleren ontzia barruan, Hibaika eta Pasaia Eusko Tren Ligan sartzen saiatuko dira.
Iritsi da egutegian seinalatutako asteburua. Bihar Sestaon (18:00) eta etzi Zierbenan (12:00) erabakiko da udaran zein lau traineru lehiatuko diren Euskotren Ligan. Bat dagoeneko ezaguna da, San Juango batelerena, iazko txapelketa irabazteagatik automatikoki sailkatuta baitaude arrosak. Beste hiru postu daude jokoan, eta hautagai asko, horien artean Hibaika eta Hondarribia, batez ere azken hauek.
Hiru postu daude jokoan. Badirudi Orio koska bat aurretik dagoela, eta postuetako bat beretzat izango dela. Beste bi postuetarako hautagai nagusiak Donostia Arraun, Deustu, Donostiarra eta Hondarribia dira; laurek erakutsi dute egun ona izanez gero lehen lauren artean sailkatzeko gai direla.
Hondarribia Arraunek lortuko balu, lehen aldiz ariko lirateke berdeak Euskotren Ligan. Meritu handiko lorpena litzateke, kontuan izanik iaz ezin izan zirela uretaratu, emakume faltagatik. Aukera errealak dituzte berdeek, Emakumeen Traineruen Elkarteko (ETE) orain arteko bi proba ez puntuagarrietan 5. (Portugaleten, kale txarretik), eta 4. (Donibane Lohizunen) izan baitira. Aste honetan Bertako Igogailuak babeslearekin akordio sinatu dute hondarribiarrek, eta Euskotren Ligarako sailkatuaz berretsi nahiko dute.
Hibaikako oreretarrak ez daude aurreko urteetako egoeran, taldea goitik behera berritu dutelako aurten, harrobiko gazteekin. Sailkatuko balira ezusteko itzela litzateke, orain arte 4.etik oso urruti ibili baitira.
Mutilen lau estropada
Erabakiorrenak neskenak diren arren, mutilak ere uretaratuko dira asteburuan. Eusko Label Ligako ontziak eremu berberetan lehiatuko dira, Sestaon bihar eta Zierbenan etzi, nesken sailkatze proben ondoren. Oarso Bidasoko traineruei dagokionez, Hondarribia banderaren bila aterako da, ohorezko txandan. Pasaiako bi eskifaiek hasierako laukotean bogatuko dute.
KAE ligetan bi bandera zeuden aurreikusita etzirako, baina bakarra jokatuko da, Getariakoa, KAE1 Ligaren barruan. San Juan Bk eta Hibaikak lehen txandan bogatuko dute, pixkanaka-pixkanaka sailkapenean postuak igotzeko esperantzarekin.
KAE2ko Sestaoko Bandera bertan behera geratu da, Iberia talde antolatzaileak ez dituelako estropada egiteko behar diren baimenak lortu. Hortaz, Hondarribiko eta San Pedroko B traineruek atseden izango dute asteburuan.
