Antxon bada traka...
Sanferminak ospatzen ari dira Pasai Antxon eta asteburua ekitaldiz lepo heldu da; gaur, Gazte Egunaren da eta Euskal Jaiaren txanda
San Fermin Eguna da bihar, eta Pasaiako elastiko ezagun baten leloak dion bezala, Iruñean eta Lesakan bezala, Pasai Antxon baita ere bada traka. Festetan murgilduta daude antxotarrak asteazkenaz geroztik, eta asteburuaren atarian herrikoak ez ezik, bisitariak bilduko dira festara. Ekitaldiz lepo heldu da asteburua, parrandazaleenak asetzeko moduko eskaintzan. Gaur, nabarmentzekoak, bi ekitaldi: Gazte Eguna batetik, eta Euskal Jaia bestetik.
Eguerdian, Euskal Jaiaren barruan kuadrillen arteko jolasak Biteri plazan egingo dituzte, eta ondoren, toki berean herri bazkaria. Elektrotxaranga batek girotuko du Euskal Jaiaren bazkalostekoa.
Gure Zumardian da Gazte Eguneko bazkaria. Elastiko berdeak soinean gazteenek 14:30ean dute bazkaria. Jolasak bazkal ostean egingo dituzte, eta festa luzatzeko, poteo luzean, Sakatu Elektrotxarangaren laguntza izango dute.
Bihar, mutxikoak
Bihar, San Fermin Eguna, Saltseroen konpartsaren eguna da. Antxoko konpartsarik beteranoenetakoak, lekukotza bermatzeko ahaleginean, gazteak erakarri ditu aurten bere festara, eta aldaketa igarriko dela ziurra da.
Bestela, egitarauan, patroiaren eguneko klasikoak. Goizean goiz (07:00etan) helduentzako bigantxak; eguerdian txakolin dastatzea eta nafar jotak; eta arratsaldean haurren danborrada eta Basari elkartearena. Mutxikoak ere aterako dira dantzara, 18:30ean.
Hori bai, urtero San Fermin Egunez Basari elkarteak antolatzen duen herri kirolen erakustaldia, aurten igande goizean izango da, 13:00etan, Gure Zumardian. San Fermin Eguna larunbatarekin egokitu izanaren ondorioak.
Egitaraua
