Kriminalitate tasa Bizkai eta Arabak baino baxuagoa du, eta arau hausteen tasa behera egiten ari da 2011z geroztik.
Txasko eta Mendoza azterlanaren lehen zatia den diagnostikoa aurkezten.
Errenteria herri “nahiko segurua” da, kriminalitate tasa Bizkai eta Arabak baino baxuagoa du, eta arau hausteen tasa behera egiten ari da 2011z geroztik. Horiek, KREI EHUren Kriminologiaren Euskal Institutuak Errenteriako segurtasun ezaren gainean 2017an egindako azterlanaren ondorioak.
Diagnostiko hori Errenteriako Udalaren Herritarren segurtasunean Parte Hartzeko Tokiko Kontseiluak eskatutako ikerketaren lehen atala da. 2016aren amaieran sortu zuen udalak tokiko kontseilu hori, eta helburua segurtasunaren alorra aztertzea dela azaldu du Julen Mendoza alkateak, “perspektiba integratzaile batetik, ez soilik ikuspegi polizial batetik, bide polizialetatik gutxitu egiten delako arazoa, baina ez desagerrarazi, eta nola aurre egin segurtasunaren gaiari ikuspegi zabal horretatik. Segurtasunarekin harremana duten gaiei erantzun integrala ematea du helburu kontseiluak”. Bertan udaleko hainbat azpisailek, gizarte arazoetan ibilbidea duten gizarte eragilek, hezkuntza eragileek, eta Osakidetza, Ertzaintza eta Udaltzaingoko ordezkariek hartzen dute parte.
Azterlanean, datu objektiboak aztertu dituzte, baita herritarren pertzepzioa ere. Datu objektiboek herria nahiko segurua dela erakusten dute, ez duela kriminalitate datu alturik, eta jaisten ari dela gainera, baina horrek herritarren pertzepzioarekin egiten du talka. Izan ere, inkesta egin zaien 351 biztanleen artetik %55ak du sentsazioa Errenteria ez dela hiri segurua. Are gehiago, segurtasuna jaisten ari den ustea ere badute. “Pertzepzio horrek talka egiten du errealitatearekin, eta aintzat hartu behar da. Pertzepzio horren gainean eraiki behar ditugu beraz gure lan ildoak”.
351 inkesta
351 herritarrei egin diete inkesta azterlanaren arduradunek, auzo ezberdinetan. Aleatorioki egin dituzte, kalean eta auzo ezberdinetan izan dira inkestagileak. Horietatik %66 emakumeak dira eta %3a gizonak, gehienak 25-55 urte artekoak (%69). Herri nahiko segurua izanda ere, segurtasun pertzepzio hori ez dutela herritarrek utzi du agerian azterlanak eta udalari dagokiola segurtasun eza sentsazioa eragiten duten kausak identifikatzea esan du Mendozak.
Horretarako beste polizia ereduetara jo dutela azaldu du Mendozak, “mediterraneoko polizien eredua batez ere. Handik datoz egun martxan ditugun polizia prebentiboa eta auzoko polizia ereduak. Hainbat lekutan, batez ere pertzepzioa lantzen dute, errealitateak kontrakoa erakusten badu ere”.
Diagnostikoa da gaur Mendozak Jon Txasko zinegotziarekin batera aurkeztu duena. Hurrengo urratsa, ekintza plana izango da orain. Argi esan du Mendozak, “ekintza plana ere integrala izango da, ez da polizia gehiago izatea, baizik eta delituak murriztuko dituzten eta herritarrek duten pertzepzioa errealitatearekin bat etortzen lagunduko duten neurriak hartzea”.
Prebentzio neurriak hartzen aspalditik
Udala aspaldi hasi zela hainbat neurri hartzen azaldu du Txaskok ikuspegi zabal batean. Horren harira, udalak lan prebentiboa egiteko martxan dituen bost ekintza aipatu ditu: Ertzaintzarekin koordinatuta dago gatazkatsuenak diren puntuetan eta sistematikoki egiten direnez gain operazio bereziak behar direnerako; 11 udaltzain berri sartuko ditu eta horretarako oposizio prozesua amaitzear da udala (2014an beste hamar plaza atera zituen); kale hezitzaileak jarriko ditu udalak gainera, irailetik aurrera, kalean bertan lantzeko gizarte arazoak eta saihesteko segurtasun eza egoerak gertatu eta arau hauste penalak egin ditzaten; udalak azken urteetan apustu irmoa egin du kaleko argiak Led sistemakoekin ordezkatzeko. Horiek argi handiagoa ematen dutela eta segurtasun handiago sentsazioa ere ematen dutela zehaztu du Txaskok, “aldaketa horiek gauzatzeko 1.022.000 euroko inbertsioa egin du udalak”; Kaleen garbiketa da azken neurria, “segurtasuna delinkuentziarik ez izatea baino gehiago delako, adibidez, elkarbizitzarako giro egokia izatea. Horretarako udalak urtean 500.000 euro gehiago inbertitu ditu”.
Amaitzeko datu bat eman du Txaskok, 2017an izandako arau hauste penalak %0,7 jaitsi direla, Gipuzkoa, Bizkai eta Araban %1,46 igo diren bitartean. Datua pozgarria dela aitortuta, udalak herritarren bizi baldintzak hobetzeko lanean jarraituko duela berretsi du.
