Sindikatuaren arabera, postuak betetzeko prozesua hasi aurretik "izen-abizenekin" zeuden ezarrita horiek. Lau lanpostu dira orotara.
LABek erreklamazioa egin dio deialdiari.
LAB sindikatuak Pasaiako Portu Agintaritzak egindako bi lan poltsa deialditan “ustezko iruzurra” izan dela salatu du. Horietako bat kalitatezko hiru arduradun izateko zen, bestea portuko operazio teknikaria izateko; lau postu ziren orotara deialdietan atera zirenak. Sindikatuak adierazi duenez, oposaketarik gabe eta lehiaketaldiarekin soilik atera ziren deialdiak, “argitaratutako oinarrietan zein balorazio sistema ezarrriko zen aipatu gabe, gure zalantzak areagotuz”.
Hala, postu horien hautagaien berri izan, eta horien gaineko erreklamazioa egiteko “aukera anitzak” daudela uste du LABek. Hori adierazteko, sindikatuak aipatu du teknikari posturako ez dela baloratuko antzeko zereginetan hautagaiak izan dezaketen esperientzia, eta gainera, prozesu osoa Bilboko enpresa baten esku utzi dela, “hau ere EAJko kargu baten esku, Portuko Agintaritza bezala”. Horregatik, Portu Agintaritzako presidente Felix Garciandiaren aldetik, LABen ustez, “gardentasun eta inpartzialtasun” eza izan dira, “enplegu publikoan onartezina da hori. Uste dugu kasu honetan postu horiek izen-abizenekin ezarrita zeudela, prozesua hasi aurretik”.
Egoera “lotsagarria” dela esan du sindikatu abertzaleak, eta salagarria dela, “ez dugu baztertuko inongo biderik egoera hau behar bezala bideratzeko, beti kontuan hartuz enplegu publikoan gardentasuna, aukera berdintasuna eta langileen ordezkariekin prozesu guztia adostua izan behar dela”.
Aurrekariak
Salaketa publiko egiterakoan, gaiaren gaineko hainbat xehetasun eman ditu LABek, hori kokatze aldera. Hala, Felix Garciandia otsailean agintaritzako lehendakaritzara iritsi zenean eten egin zituela ordurako adostuak zeuden kontratazio eta deialdi batzuk, “erabili behar ziren prozedurak ezagutzen ez zituela esanez, eta ordura arte komiteak zein giza baliabideetako sailak eginiko lanari muzin eginaz eta mespretxatuz”.
Postu horien deialdi berria ekainean argitaratu zuen agintaritzak; “harriduraz” jaso zuen erabaki hori LABek, “oinarriak eta tribunala komitearekin adostu gabe zeudelako”. Hala, ordura arte akordio bidez egindakoari agintaritzako presidenteak muzin egin diola ziurtatu du sindikatuak, “Garciandiak ez du ikusten horrelako bidea egin behar dugunik, nahiz eta estatuko hitzarmenean horrela jasota dagoen”.
