Eguzki: "Ulian ehiza berriro baimenduko dutela uste dugu"
Foru Aldundiak Ulia segurtasun-eremu izendatu zuen 2014an eta ordutik ehiza debekatuta dago eremu honetan. Foru Agindu berri batek bertan behera utzi du dekretu hori.
Gipuzkoako Foru Aldundiak Ulia segurtasun-eremu izendatu zuen 2014an eta ordutik ehiza debekatuta dago eremu honetan. Foru Agindu berri batek bertan behera utzi du dekretu hori.
Aldundiak Foru Agindu berri bat emateko utzi du bertan behera aurretik zegoena. Eguzki talde ekologistak lege berri hori ehizaren aldekoa ala aurkakoa izango den kezka azaldu du. Ehiza Kontseiluaren azken bileran ehiza-aldia arautuko duen lege berri bat aterako zutela esan zuen Foru Mendietako zuzendariak. Baina Ulia jada ez denez segurtasun eremua, ehiza praktika daitekeela salatu du Eguzkik: “Dagoeneko ez dago debekatuta eta praktika gogaikarri eta arriskutsu hori edozein parke publikotan egin daiteke”.
Ulia milaka herritarrek bizi dutela gogorarazi dute ekologistek, “tiro egin gabe”. Hamaika bidek zeharkatzen dutela, Donejakuek edo eta Talaiak, esaterako. Azken honetan 100.000 pertsonatik gora ibili ziren iaz.
Argudio hauekin, arduraz jokatzeko eskatzen diote aldundiari zein Donostiako eta Pasaiako udalei. “Ehiza baimenduz gero ingurune horren erabiltzaileei bizkarra emango diete eta berriro ere lobby horren aurrean amore emango dute”, salatu dute, “erabiltzaile gehienak daude ehiza debekatzearen alde”.
Era berean, herri elkarteek Ulian ehiza egin ez dadin lanean jarraituko dutela adierazi dute. Donostiako zein Pasaiako 27 elkartek, adibidez, Ulia parke segurua eta denontzat izenburuko agiria sinatu dute, tartean daudela, Itsas Mendi Elkartea, Trintxer Elkartea, Itsastarrak Mendi Taldea, Club Atletico Trintxerpe eta Pasaia Kayak.
