Gaur bertan deitu du manifestaziora Oreretako Mugimendu Feministak 19:30ean herriko plazatik abiatuta, bertan izango da udala, eta bertan izatera deitu ditu herritar guztiak ere.
Atzoko plenoaren irudi bat.
Aho batez onartu zuen plenoak Julen Mendoza alkateak atzo aurkeztutako urgentziazko mozioa. Atzo goizaldean gertatutako
eraso matxistaren gainekoa zen mozioa, eta gaitzespenik gogorrena erakutsi zioten eraso horri ordezkaritza duten alderdi politiko guztiek. Erasoa pairatu duen emakumeari zein bere ingurukoei elkartasun eta babes osoa erakutsi dio plenoak, eta informazio eta baliabide guztiak jarri ditu eraso duten emakumearen eskura, baita bere onera etortzeko prozesuan behar izan dezakeen laguntza guztia ere.
Gertaeraren berri izan zuen momentutik eta informazioa egiaztatu, kontrastatu eta bildu ondoren, indarrean duen protokoloa jarri zuen martxan udalak. Garazi Lopez Etxezarreta Berdintasun zinegotziak emakumeen aurkako indarkeriak arazo sakona duela oinarrian, estrukturala, nabarmendu zuen “egia da erasotzaile eta biktima banakakoak dituela beti, baina arazo sakon bat dauka jatorrian: emakumeak kontrolpean eta mendean izan nahi dituen ideologia. Indarkeria hori ez da ekintza isolatuen edota azalpenik gabeko gertakarien emaitza. Aitzitik, generoaren gaineko aurreiritziak, gizartean aski errotuta dauden horiek dira, hain zuzen ere, halako ondorio larri eta tamalgarrien sortzaile”.
Alderdi guztiak haserre
“Pena”eta “haserrea” azaldu zuen Lopez Etxezarretak, gainera, “berriro halako gai bat ekarri behar dugulako plenora”. Indarkeria matxistarekin amaitzeko gakoa ere eman zuen: gizarte eredua aldatzeko lanean jarraitzea.
EAJren izenean Garbiñe Oiarbidek hartu zuen hitza atzo plenoan eraso duten emakumeari babes osoa azaltzeko. “Emakumeok beldurrik gabe bizitzeko eskubidea dugu, eta hala izan dadin gizartea aldatu beharra dago”. Jaien atarian, ez ezetz dela gogorarazi zuen Oiarbidek. Errenteria Irabaziz alderdiak ere elkartasuna erakutsi zion emakumeari eta Nagore Basurto zinegotziak edozein eraso matxistari zero tolerantzia erakutsi behar zaiola esan zuen, “gure gaitzespenik gogorrena eta ozenena indarkeria matxistari”. PSE-EEko Jose Angel Rodriguezek ere babesa erakutsi zion emakumeari alderdiaren izenean. Lanean jarraitzeko konpromisoa berretsi zuen.
Errenteriako Udalak ez duela atsedenik hartuko bizikidetza demokratikoaren oinarriak auzitan jartzen dituen arazo sozial larri honen irtenbidea bilatu arte jaso dute mozioan. Horrenbestez, aho batez, bost puntuko adierazpen instituzionala adostu zuen udalak. Erabat gaitzetsi du atzo Errenterian gertatutako eraso sexista, eta halaber, emakumeei egindako edozein indarkeria motaren aurrean gaitzespena erakutsi du ere, “edozein eraso matxistaren aurrean, zero tolerantzia”. Halako gertaerak ez dituela onartzen eta lanean jarraitzeko konpromisoa berretsi zuen emakumeak indarkeria matxistarik gabe bizi daitezen. Eraso duten emakumearen eskura beharrezko baliabide guztiak jarri ditu udalak, eta azkenik, eraso sexista gaitzesteko deituko diren elkarretaratze eta manifestazioekin bat egin du. Gaur bertan deitu du manifestaziora Oreretako Mugimendu Feministak 19:30ean herriko plazatik abiatuta, bertan izango da udala, eta bertan izatera deitu ditu herritar guztiak ere.
Bikote kide ohiak atzo goizaldean sexu erasoa, eraso fisikoa eta mehatxuak egin zizkiola salatu zuen Ertzaintzaren komisarian emakume batek. Segurtasun Sailaren informazioaren arabera, gizonak bere buruaz beste egin zuen emakumea eraso ondoren, GI-636 errepidean, Altamirako tunelean, Lezo eta Errenteria artean goizaldean bertan.
