GOT Grupo Oarso Taldeak mozioa aurkeztu zuen atzo plenoan gizarte bazterketa eta pobreziaren aurkako Herri Ekinaldi Legegilea babestea eskatzeko.
GOTeko kide Kepa Olaiz mozioa azaltzen atzoko plenoan.
GOT Grupo Oarso Taldeak mozioa aurkeztu zuen atzo plenoan gizarte bazterketa eta pobreziaren aurkako Herri Ekinaldi Legegilea babestea eskatzeko. GOTeko ordezkariak aurkeztu zuen mozioa, eta udalean ordezkaritza duten alderdi politiko guztiei eskatu zien beharrezkoa egin dezaten kalitatezko babes sistema publiko soziala bermatzeko, “eskatzen dizuegu gizarte bazterketa eta pobreziari aurre egiteko bidean indar guztiak jartzeko. Horregatik ari gara Herri Ekinaldi Legegilea egiten, erakunde eta politika publikoen lehentasuna pertsonek behar dugulako izan, ez banketxe, enpresa handi edota espekulatzaileak”.
Hiru puntu zituen mozioak. Lehenengoan Herri Ekinaldi Legegilea babesteko eskatu zuen GOTek; Diru Sarrerak Bermatzeko eta Gizarte Inklusiorako legea aldatzea eskatu zuen bigarrenean, Diru Sarrerak Bermatzeko Errentan azken urteetan egindako murrizketak bertan behera uzteko. Hirugarren puntuan, azkenik, etxebizitzaren gaineko legea aldatzea eskatu zuen GOTek, alokairu sozialeko etxebizitzarako eskubide subjektiboa benetakoa izan dadin. Mozioaren helburua,pobrezia eta bazterketa sozialik ez duen Errenteria-Orereta lortzeko bidean urrats bat gehiago egitea zela esanda amaitu zuen interbentzioa GOTeko kide Kepa Olaizek.
Egungo egoera ekonomikoak gizartearen zati bat egoera larrian utzi duela esan zuen EAJko Garbiñe Oiarbidek, baina hala ere, Araba, Bizkai eta Gipuzkoan Espainiako Estatuan eta Europako Batasunean baina baldintza hobeagoak direla erantsi zuen. Horren harira, lanean jarraitu beharra dagoela esan zuen, babes soziala lantzen. Hala ere, abstentzioaren alde egin zuen bere alderdiak. PSE-EEk mozioaren kontra egin zuen Isaac Palencia zinegotziak, azaleratutako diagnostikoarekin bat egiten zutela azaldu bazuen ere, “baieztapen batzuk ez ditugulako partekatzen. Lehen puntua gainera eztabaida prozesuan dago oraintxe eta ez dugu eskaera babestuko horregatik”.
Errenteria Irabazizek eta EH Bilduk babestu zuten mozioa. Irabazizeko Nagore Basurtok Diru sarrerak Bermatzeko Errentaren erreformarekin egoera hobetzea ezinezkoa ikusten duela esan zuen, eta gogor salatu zuen Lanbidek bere gain hartu duenetik Diru Sarrerak Bermatzeko Errentaz egin duen kudeaketa “gehiegizkoa eta kasu batzuetan ilegala ere esango nuke”. 60.000 pertsona bizi direla pobrezian Araba, Bizkai eta Gipuzkoan esan zuen, eta 63.000 lagunek dutela sarbidea diru sarrerak bermatzeko errentarako baina horiek ere pobrezian bizi direla.
Eñaut Gracia mintzatu zen EH Bilduren izenean eta mozioaren mamira jo zuen: “Gizarte ereduaz ari da mozioa, hausnarketa hori da, eta gizartea aldatu egin da”. Kapitalismoaren urrezko garaia aipatu zuen, “bizi baldintza duinak zenituen lana bazenuen. Gaur egun izan dezakezu lan bat, bi edo hiru, eta pobrea izan. Zer esanik ez lanik ez baduzu. Balorea eredu soziala da”. Mugimendu sozialekin, sindikalekin eta gizarte zapalduaren aldean izango direla beti erantsi zuen Graciak.
Mozioak aurrera egin zuen Irabaziz eta EH Bilduko zinegotzien 11 botoekin, EAJk abstentzioaren alde egin zuen, eta PSE-EEk berriz mozioaren kontra bozkatu zuen.
