Donibanen jaia hasteko bi egun besterik ez
Azken prestaketak Donibaneko jaitarako. Asteazkenean hasiko dira eta publiko egin dituzte ekintza guztiak.
Uztailaren 25ean hasiko dituzte jaiak Pasai Donibanen. 6 eguneko egitaraua antolatu dute ongi pasa nahi duen guztiontzat.
Santiago plaza izango da sanjuandarren aterpe uztailaren 25etik 31ra. Aurten jaiak Santiago Egunean bertan hasiko dituzte eta San Inazio egunean amaitu. Betiko ekintzen eta proposamen berrien koktela prestatu dute eta jada publiko egin dute.
Txupinazoa baino lehen buruhandiak, elektrotxaranga eta mus txapelketa egongo dira. 20:00etako suziria lehertu ondoren, afaria antolatu dute gazteek. Ostegun goizaldean, bi lehiaketa: marmitakorik onena eta balkoietako lore apainketarik onena. Arratsaldean, berriz, txikienentzat abordaia eta jolasak egongo dira eta gazteek sukaldatutako pintxo lehiaketa Bonantzan. Andoni Oilokiegik girotuko du afalostera arteko denbora eta ondoren Habanerak egongo dira plazan.
Ostiralean, mahoizko gona eta galtzak atera, alkandora txuri edo urdina jantzi eta alpargaten gainean, sardinak eman zein jatera irtengo dira kalera. Beti bezala, txarangaren doinuaz eta parrilen usainaz girotuta. Gauean, danborrada egongo da.
Hortik aurrera, hamaika aukera, astearte iluntzera arte. Egitarau osoa hemen ikusgai. 
