Pasaiako palistak Euskadiko azkarrenak

Lander Rodriguez pasaitarra eta Amaia Benavente errenteriarra azkarrenak izan dira Euskadiko Kayak Txapelketan. Dominak baina ez dira bukatu. Pasaia Kayak talde gisa ere txapeldunak izan baitira.

Ainhoa Mariezkurrena

Pasaia

2018/07/24

Aritz Araneta, Lander Rodriguez eta Antton Araneta pasaitarrek osatu zuten podiuma.

Lander Rodriguez pasaitarra eta Amaia Benavente errenteriarra azkarrenak izan dira Euskadiko Kayak Txapelketan. Dominak baina ez dira bukatu. Pasaia Kayak talde gisa ere txapeldun izan baita. Larunbatean jokatu zen itsas kayakeko Euskadiko Txapelketa, Zokoa eta Hondarribi arteko uretan. Haizea eta olatuek joka, 12 kilometroko ibilbidea egin zuten kirolariek. Gizonezkoen proba parekatua egon zen. 9. kilometroan Rodriguez bera, Aritz Araneta taldekidea eta Villagarcia Fortuna taldeko beteranoa zeuden aurre hartuta, Novakowski palista frantziar internazionala atzean utzirik. Azken metroak ere parean, eta sprintean egin zituzten hiru aurrenekoek azken txanpa. Segundo eskas batengatik izan zen txapelduna Rodriguez. Araneta bigarren eta Villagarcia hirugarren 8 segundotara. Senior kategorian Antton Aranetak brontzea lortu zuen. Emakumezkoen proban Benaventek, Donostia Kayakeko errenteriarrak, erraz lortu zuen lehengoa izatea. Modalitate guztietan dabil ongi eta hala erakutsi du azkeneko txapelketetan. Aurreko astean, Verdudidon, sprint olinpikoko probetan arrakasta lortu zuen, eta larunbatean irabazteko arazorik ez zuen izan. Honekin, taldekako titulua Pasaia Kayak-ek irabazi zuen, 120 punturekin. Barrika izan zen bigarrena 62 punturekin eta Plentzia hirugarrena 59rekin. Talde pasaitarrak bere historian lehen aldiz lortu du titulu hau.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.