Hibaikako emakumeak bikain aritu dira Kontxako Banderaren lehen jardunaldian. Bosgarren postua lortu dute, eta hori finkatzea eta ahal badute hobetzea izango dute erronka igandean Javi Perez presidentearen hitzetan.
Hibaikakoak joan den osteguneko Kontxako sailkapenerako estropadan.
Madalen ontzia bosgarren sailkatu zen atzo jokatu zen Kontxako Banderaren lehen jardunaldian. Ongi aritu ziren Hibaikakoak, bikain, bigarren txandan, eta bigarren luze ikusgarria eskaini zuten. San Juango Batelerek markatu zuten denborarik onena, eta Hibaika 0:19,76ra gelditu zen 11:01,42ko denbora eginda.
Pozik dago taldea emaitzarekin. Hala aitortu du Hibaikaren presidente Javi Perezek, atzoko estropadaren ostean sentsazio oso onak dituela klubak esan du, “ezin hobeak. Aurtengo denboraldia nola hasi dugun kontuan hartuta, praktikoki ontzia uretan izango zen zalantzan izan dugunean, bikain aritu dira”.
Kontxaren bigarren jardunaldiari begira, atzo lortutako bosgarren postu hori mantentzea izango dutela erronka Hibaikako emakumeek esan du Perezek, “ahal bada, zerbait gehiago lortzera joango dira, baina uste dut bosgarren hori mantentzea dagoeneko lorpen handia izango dela. Goian dauden lau ontzien maila, teorian handiagoa da, eta egia da haize eta itsaso aldaketa izango dela eta agian aukera dagoela denbora hobetzeko. Hala ere, bosgarren postu hori finkatuta, ETE liga gure aurretik amaitu duen Donostiarra ontziaren aurretik sailkatuko ginateke. Gorago begiratzea badago agian, baina oinak lurrean, postu hori finkatzea izango da erronka”.
Hibaikako emakumeek ontzia zintzilikatzekotan izan ziren denboraldia hasi aurretik, baina hala ere, Madalen uretan izatea lortu dute. Hiru beterano ari dira egun, baina gainontzeko arraunlariak harrobiko jubenilak dira eta arraunaren olinpiada den Kontxako Banderan izatea dagoeneko izugarria dela nabarmendu du Perezek, “satisfazioa arraunlarientzat eta klubarentzat. Irabazi zuten azkeneko bandera, Plentziakoa, ontzian bost jubenil zirela irabazi zuten, ontzi gaztea da oso, bizpahiru beterano dituena, baina oso gaztea da. Bi markak jubenilak dira. Emaitza oso oso ona da, bigarren luzea San Juanek baino hobea egin zuten”.
Beste urteetan izan duten urduritasun eta presioaz ere mintzatu da Perez: “San Juanekin batera faboritoa izan denean Hibaika presioa sumatzen zen, urduritasuna arraunlarien artean, klubeko kideen artean baita zaleen artean ere. Aurten presiorik gabe irten dira uretara, lasaiago, eta bikain ari dira”.
Zaleei ere egin die deia Hibaikako presidenteak, datorren igandean ere Donostiara bildu daitezen: “Espero dugu zale ugari animatzea arraunlariak babestera. Jendea behar dugu bertan, ez soilik bandera irabazteko aukera dagoenean, baita bestelakoetan ere, emakumeei animatzen aurten egiten ari diren lan handiarengatik”.
